नेपाल भ्रमणमा रहेको विश्वको ऐतिहासिक मेरिलेबोन क्रिकेट क्लब (एमसीसी) र नेपाली राष्ट्रिय टिमबीच आजबाट तीनदिवसीय खेल सुरु भएको छ।
किर्तिपुरस्थित त्रिवि मैदानमा नेपालले टस जितेर पहिले बलिङ गर्दैछ।
खेललाई प्रमथ श्रेणीको मान्यता रहेको छ। टेस्ट बाहेकका राष्ट्रले खेल्ने दुई इनिङको प्रतियोगितालाई आइसिसीले प्रमथ श्रेणीको मान्यता दिनेगर्छ।
खेलमार्फत कप्तान ज्ञानेन्द्र मल्लसहित विनोद भण्डारी, ललितनारायण राजवंशी, राजु रिजाल, आरिफ शेख, सन्दीप लामिछाने, दीपेन्द्रसिंह ऐरी, करण केसी, पवन सरार्फ गरी ९ जनाले प्रथम श्रेणीको क्रिकेटमा डेब्यू गरेका छन्।
नेपालले प्रथम श्रेणीको क्रिकेट सन् २००५ पछि पहिलो पटक खेल्न लागेको हो। १४ वर्षअघि घरेलु मैदानमा यूएईसँग अन्तरमहादेशीय तीनदिवसीय प्रतियोगिता नेपालको पछिल्लो प्रथम श्रेणीको खेल हो ।
सन् २००९ मा पनि नेपालले एमसिसीसँग तीनदिवसीय खेल खेलेको थियो। एमसिसीविरुद्ध नै खेलेको त्यो प्रतियोगितालाई भने प्रथम श्रेणीको मान्यता थिएन। सन् २००९ मा एमसिसीविरुद्ध ज्ञानेन्द्र मल्लले खेलेका थिए।
एमसिसीविरुद्धको उक्त खेललाई प्रथम श्रेणीको मान्यता नहुँदा राष्ट्रिय टिमका कप्तान ज्ञानेन्द्रले पनि प्रमथ श्रेणीमा डेब्यू गरेका हुन्।
नेपाली टिममा रहेका खेलाडी मध्ये सोमपाल कामी र शरद भेषवाकर मात्र प्रथम श्रेणीको क्रिकेट खेलेका छन्।
सोमपालले सन् २०१६ मा श्रीलंकाको सारासेन्स स्पोर्टस क्लबबाट दुई वटा प्रथम श्रेणीको क्रिकेट खेलेका थिए । शरदले भने सन् २००५ मा नेपाली टिमबाट प्रथम श्रेणीको क्रिकेट खेलेका थिए।
प्रथम श्रेणीको नेपाली टिम
ज्ञानेन्द्र मल्ल (कप्तान), आरिफ शेख, विनोद भण्डारी, दीपेन्द्रसिंह ऐरी, करण केसी, ललितनारायण राजवंशी, पवन सर्राफ, राजु रिजाल, सन्दीप लामिछाने, शरद भेषवाकर, सोमपाल कामी