आइपिएलमा बिहीबार पञ्जावविरुद्धको खेलमा दुई क्याच मिस गरेका बेंग्लोरका कप्तान विराट कोहलीको अहिले आलोचना भइरहेको छ।
पञ्जावसँग ९७ रनले पराजित भएको खेलमा विराटले क्याच मिस गर्नुको अलवा खराब ब्याटिङ गरेका थिए।
कोहलीले ५ बल खेल्दा १ रन मात्र जोड्न सके। खेलमा स्लो ओभर गरेको भन्दै कोहलीलाई आइपिएलले १२ लाख भारु जारिवाना समेत गरिसकेको छ।
कोहलीले बिहीबार खराब ब्याटिङ गरेपछि भारतका पूर्व कप्तान तथा कमेन्टेटर सुनील गावस्करले चर्को आलोचना गरेका थिए।
कोहलीले लकडाउनको बेला श्रीमती अनुस्का शर्माको बलमा मात्र अभ्यास गरेको भन्दै गावस्करले टिप्पणी गरेका थिए।
यसअघि लकडाउनको बेला कोहली र अनुस्काले घरमा क्रिकेट खेल्दै गरेको भिडियो भाइरल भएको थियो।
बिहीबार कोहलीले खराब ब्याटिङ गरेको विषयमा आफूलाई मुछेको भन्दै अनुस्का आपत्ति जनाएकी छिन्। इन्स्टाग्राममा लामो स्टोरी पोस्ट गर्दै अनुस्काले गावस्करसँग जवाफ समेत मागेका छिन्।
अनुस्काले गावस्करको टिप्पणी निकै खराब भएको भन्दै गावस्कारले अरुको इज्जत गर्ने गरे पनि आफ्नो इज्जत नगरेको बताएकी छिन्।
उनले 'श्रीमानको खेललाई लिएर श्रीमतीलाई किन आरोप लगाइन्छ?' भन्दै प्रश्न गरेकी छिन्।
गावस्करले यसअघि कमेन्ट्री गर्दा क्रिकेटरको नीजि जीवनको विषयलाई सम्मान गर्ने गरेको अनुस्काले स्मरण गरेकी छिन्। साथै अरुलाई सम्मान गर्ने गावस्करले अहिले आफूमाथि विभेद गरेको अनुस्काको भनाइ छ।