सिद्धार्थ बैंक नेपाल प्रिमियर लिग (एनपिएल) को दोस्रो सिजनमा चर्चामा आएका खेलाडी हुन्, शेर मल्ल।
२३ वर्षीय दायाँ हाते स्पिनर मल्लले दोस्रो सिजनको एनपिएलमा लुम्बिनी लायन्सका लागि १० खेलमा १७ विकेट लिए। मल्ल एनपिएलका एक मात्र त्यस्ता खेलाडी बने जसले लगातार दोस्रो उपाधि जित्न सफल भए।
यो सिजन लुम्बिनीबाट उपाधि जित्दा अघिल्लो सिजन जनकपुर बोल्ट्सका लागि च्याम्पियनको यात्रा गरेका थिए। उनले दुई उपाधि जित्दा एउटा संयोग बन्यो- दुवै फाइनलमा आफ्नो घरेलु टोली सुदूरपश्चिमलाई हराउनु।
एनपिएलमा उदीयमान खेलाडी घोषित हुनुअघि उनले 'मिस्ट्री बलर'को उपमा पाएका थिए। पावरप्लेमा विकेट निकाल्ने र चाहिएको बेलमा ठूला सर्ट प्रहार गरेर रन बनाउन सक्ने क्षमता भएका उनको प्रशंसा भइरह्यो।
मल्ललाई भारतीय कमेन्टेटर आकाश चोपडाले आइपिएल खेल्न सक्ने बलरको रूपमा चित्रित गरेका थिए। काठमान्डु गोर्खाज तथा नेपाली राष्ट्रिय टोलीका पूर्वप्रशिक्षक मोन्टी देसाइले पनि उनको प्रशंसा गरेका थिए।
फाइनलमा ३ विकेट लिएका मल्ल सर्वाधिक विकेट लिने बलरको सूचीमा सन्दीप लामिछानेसँगै शीर्ष स्थानमा रहन सफल भए।
एनपिएलमा उत्कृष्ट प्रदर्शन गरेका मल्लले अर्को महिना फेरि इतिहास रच्ने भएका हुन्।
एनपिएलमा उत्कृष्ट प्रदर्शन गरेसँगै मल्ल आइसिसी टी-२० विश्वकप २०२६ का लागि घोषणा गरिएको नेपालको १५ सदस्यीय टोलीमा परेका छन्।
१५ सदस्यीय टोलीमा पहिलो पटक परेका उनी मात्र एक खेलाडी हुन्। अब उनले विश्वकपको ठूलो मञ्चबाट नेपाली टोलीमा डेब्यू गर्ने सुनौलो मौका प्राप्त गर्न सक्नेछन्।
हुन त उनले यसअघि नेपालको ‘ए’ टोलीसँगै र यू-१९ राष्ट्रिय खेल्ने अवसर पाएका थिए।
सन् २०१७ देखि घरेलु क्रिकेट सुदूरपश्चिमबाट खेलिरहेका मल्लले राष्ट्रिय टोलीमा स्थान बनाएपछि भनेका छन्, ‘भगवानको योजना, भगवान महान् छन्!’
मल्लको जन्म सुदुरपश्चिकको डोटी जिल्लाको केआइसिंह गाउँपालिकमा भएको हो। उनी बाल्लकालमा परिवारसँगै भारतको पञ्जाब पुगेका थिए। उनका बुवाआमा त्यहाँ काम गर्ने भएकाले उनलाई पनि सँगै लगेका थिए।
उनी पञ्जाबको क्रिकेट वातावरणमा हुर्किए। पञ्जाबको गल्लीहरुमा टेनिस बलले क्रिकेट खेले। त्यसपछि उनले स्कुलको क्रिकेट टोलीबाट खेल्न सुरु गरेका थिए। त्यहाँ जिल्लास्तरका क्रिकेट खेले।
जिल्लास्तरसम्म खेलेपछि उनको क्रिकेटमा मन बस्यो। अनि व्यावसायिक रूपमा क्रिकेट सिकेको उनी बताउँछन्। सुरुमा क्रिकेटको भविष्य नभएको भन्दै परिवारको समर्थन नपाएका उनलाई अहिले भने परिवारको पूरा साथ छ।
क्रिकेट खेल्न उनी २०७५ सालमा नेपाल आएका थिए।
‘२०७५ साल मा नेपाल आएको थिएँ। मैले भारतमा खेल्छु भन्ने थाहा पाएपछि सुवास शाही (धनगढी क्रिकेट एकेडेमीका अध्यक्ष) सरले कल गरेर बोलाउनुभयो। त्यतिखेर क्रिकेट बोर्ड थिएन, त्यो एउटा चुनौति थियो। तर मेहेनत गर्छु भने केही न केही बाटो खुल्छ भनेर अघि बढेको थिए,’ मल्लले गत महिना एनपिएल जितेपछि धनगढीमा आयोजित एक कार्यक्रममा भनेका थिए।
नेपाल आएपछि स्थानीयस्तरदेखि उनले आफ्नो यात्रा सुरु गरे।
‘पाँच वर्षअघिको कुरा गर्नु पर्दा नेपालमा क्रिकेटमा केही पनि थिएन। न घरेलु क्रिकेट थियो, न केही अरु क्रिकेट थियो। हामीहरू धनगढीको लिटल फ्लावर प्रिमियर लिग खेल्थ्यौं, त्यसले चाहिँ मलाई एकदमै सहयोग गरेको थियो,’ उनले भने।
धनगढीको स्कुलले आयोजना गर्ने लिटल फ्लावर प्रिमियर लिगले प्रधानमन्त्री कपसम्मको यात्रा गर्न सहज भएको उनको अनुभव छ।
लिटल प्लावर लिग हुँदै सूदूरपश्चिमको सिनियर टोलीबाट प्रधानमन्त्री कप खेलेपछि उनी सबैको आँखामा परे।
त्यसपछि उनलाई पहिलो सिजनको नेपाल प्रिमियर लिगमा जनकपुरको टोलीमा पर्न सहज भयो। पहिलो सिजनमा उत्कृष्ट खेलेर उपाधि जिते पनि जनकपुरको टोलीमा रिटेन भएनन्। तर दोस्रो सिजका लागि लुम्बिनीको टोलीमा अक्सनमार्फत आबद्ध हुन सफल भए।
‘यो सिजनको एनपिएल सुरु हुँदा एउटा म आफ्नो लक्ष्य लिएर गएको थिएँ। विशेषगरी आफ्नो डायरीहरूमा लेखेको थिएँ। ती कुराहरू सफल हुँदा खुसी लाग्छ। लाइफमा राम्रो हुँदा धेरै प्रोत्सात्हन पनि पाइन्छ र नराम्रो गर्दा गाली पनि पाइन्छ, म यो कुराहरूलाई एउटै स्थानमा राख्छु। मलाई लाग्छ मैले अझै केही गरेको छैन, यो मेहेनतको नजिता हो। अझै बढी मेहेनत गर्नेछु। अप्स एन्ड डाउन (प्रदर्शनमा तल माथि) जे भए पनि यसरी नै सपोर्ट गर्नुहोला। मेरो बेस्ट (उत्कृष्ट) आउन अझै बाँकी छ,’ उनले एनपिएलको अनुभवसँगै आफ्नो लक्ष्य बताए।
एनपिएलमा सफलतासँगै उनले राष्ट्रिय टोलीमा पर्ने सपना बुनेका थिए। जुन सपना पूरा भएको छ। अब उनको अर्को लक्ष्य छ- राष्ट्रिय टोलीबाट डेब्यू गर्ने। सायद उक्त लक्ष्य अर्को महिना पूरा हुन्छ वा हुँदैछ हेर्न बाँकी छ।
‘नेपालको राष्ट्रिय टोलीका लागि खेल्नु गर्वको कुरा हो। र विश्वकप खेल्ने सबैको सपना हुन्छ। मेरो हातमा प्रदर्शन गर्नु र खेलमा केन्द्रीत हुनु मात्र छ। जहिले पनि 'गड्स प्लान (भगवानको योजना)' लेखेर पोस्ट गर्छु, बाँकी कुरा भगवानमा छोडेको छु। छनोट हुने क्षेत्र मेरो हातमा छैन,’ उनको भनाइ छ, ‘यदि नेपालको टोलीमा परेर टी-२० विश्वकप खेले भने भारतको मुम्बईको वानखेडे रंगशालामा इंग्ल्यान्डविरूद्धको खेलमा जोस बटलरको विकेट लिन चाहान्छु।’
टी-२० विश्वकप २०२६ खेल्ने नेपाली टोली
रोहित पौडेल (कप्तान) र उपकप्तान दीपेन्द्र सिंह ऐरी (उपकप्तान) सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, सोमपाल कामी, करण केसी, नन्दन यादव, गुल्शन झा, ललित राजवंशी, शेर मल्ल र लोकेश बम।
आरिफ शेख, बसिर अहमद, नन्दन यादव, शेर मल्ल र लोकेश बमले पहिलोपटक विश्वकप खेल्न लागेका हुन्। शेर मल्लले त विश्वकपबाट नेपाली सिनियर राष्ट्रिय टोलीमा डेब्यू गर्ने सम्भावना छ।
रोहित पौडेल (कप्तान), आसिफ शेख, कुशल भुर्तेल, दीपेन्द्रसिंह ऐरी, गुल्सन झा, ललित राजवंशी,करण केसी,सन्दीप जोरा र सन्दीप लामिछाने गरी ९ खेलाडीले भने लगातार दोस्रोपटक विश्वकप खेल्ने टोलीमा स्थान बनाएका हुन्। यी ९ खेलाडी सन् २०२४ को नेपालको विश्वकप टोलीमा पनि थिए।
सन् २०१४ को विश्वकप खेलेका सोमपाल कामीले त लगातार तेस्रोपटक विश्वकप टोलीमा परेर इतिहास रचेका छन्।
अघिल्लो संस्करणको विश्वकप टोलीमा रहेका अनिलकुमार साह, कुशल मल्ल, प्रतिश जिसी, अभिनाश बोहरा, सागर ढकाल र कमलसिंह ऐरी यस संस्करणको टोलीमा परेनन्। अनिल, सागर र कमल प्रारम्भिक टोलीमा नै परेनन् भने अरु खेलाडी प्रारम्भिक टोलीबाट बाहिरिएका हुन्।
नेपाल समूह ‘सी’ मा छ। यो समूहमा नेपालसँगै इंग्ल्यान्ड, वेस्ट इन्डिज, बंगलादेश र इटाली छन्। नेपालले पहिलो खेल इंग्ल्यान्डसँग फेब्रुअरी ८ मा (माघ २५) खेल्नेछ। अन्तिम खेल बंगलादेशसँग फेब्रुअरी १७ (फागुन ५) मा हुनेछ। नेपालका चारै खेलमा मुम्बईमा हुनेछन्।
नेपाल रहेको समूह सी
इंग्ल्यान्ड, वेस्ट इन्डिज, बंगलादेश, इटाली, नेपाल
नेपालको विश्वकपमा खेल
नेपाल भर्सेस इंग्ल्यान्ड, ८ फेब्रुअरी (माघ २५), दिउँस ३ बजे, मुम्बई
नेपाल भर्सेस इटाली, १२ फेब्रुअरी(माघ २९), दिउँस ३ बजे, मुम्बई
नेपाल भर्सेस वेस्ट इन्डिज, १५ फेब्रुअरी (फागुन ३), विहान ११ बजे, मुम्बई
नेपाल भर्सेस बंगलादेश, १ फेब्रुअरी (फागुन ५), राति ७ बजे, मुम्बई
-1756446574.jpg)
-1746009348.jpg)
