आइसिसी वुमन्स टी-२० विश्वकप ग्लोबल छनोटको तयारी गरिरहेको नेपालले अन्तिम अभ्यास खेलमा अमेरिकलाई ४ विकेटले पराजित गरेको छ।
मुलपानीमा आइतबार अमेरिकाले दिएको १५८ रनको लक्ष्य नेपालले १९ ओभरमा ६ विकेट गुमाएर पूरा गर्यो।
नेपालको जितमा सम्झना खड्काले अविजित ४९ रनको महत्वपूर्ण योगदान दिइन्। पूजा महतोले पनि अविजित ४३ रन बनाउँदै उत्कृष्ट साथ दिइन्।
यसबाहेक काजल श्रेष्ठले २८ रन तथा कविता जोशीले १२ रन जोडे।
अमेरिकाको बलिङमा तारा नोरिस र लेखा शेट्टीले २-२ विकेट लिए भने तरानुम चोप्राले १ विकेट हात पारिन्।
यसअघि टस जितेर ब्याटिङ गरेको अमेरिकाले निर्धारित २० ओभरमा ७ विकेट गुमाएर १५७ रन बनाएको थियो। एला क्लारिजले ३९ रन तथा पूजा गनेसले २२ रन बनाइन्। नेपालको बलिङमा मनिषा उपाध्यायले २ विकेट लिँदा कविता कुँवर, कविता जोशी, रिया शर्मा र रचना चौधरीले समान १-१ विकेट हात पारे।
यसअघिका अभ्यास खेलमा नेपालले स्कटल्यान्ड र अमेरिकासँग पराजय भोगेको थियो।
नेपालका दुई मैदानमा माघ ४ देखि हुने विश्वकपमा छनोटका लागि नेपालले यसअघि नै टोली घोषणा गरिसकेको छ। इन्दू बर्माको कप्तानी रहेको नेपाली टोलीको उपकप्तानको जिम्मेवारी पूजा महतोलाई दिएको छ।
नेपाली टोली
इन्दू बर्मा (कप्तान), पूजा महतो (उप-कप्तान, रुबीना क्षेत्री, सीता राना मगर, बिन्दु रावल, सम्झना खड्का, काजल श्रेष्ठ, कविता जोशी, कविता कुँवर, रचना चौधरी, रिया शर्मा, रोमा थापा, सुमन विष्ट, राजमती ऐरि, मनीषा उपाध्याय।
टी-२० विश्वकपको विश्व छनोटका खेल नेपालको त्रिवि मैदान र मुलपानी मैदानमा हुनेछन्। खेल तालिकाअनुसार नेपालको पहिलो खेल थाइल्यान्डविरूद्ध हुनेछ।
समूह बीममा नेपालले स्कटल्यान्ड, थाइल्यान्ड, जिम्बावे र नेदरल्यान्ड्ससँग प्रतिस्पर्धा गर्नेछ। त्यसअघि नेपालले आयरल्यान्ड र अमेरिकासँग वाम अप खेल खेल्नेछ। छनोटमा १० देश सहभागी हुनेछन्। तीमध्ये शीर्ष चार देश इङल्याण्डमा सन् २०२६ को जुनमा हुने महिला टी-२० विश्वकपमा छनोट हुनेछन्।
समूह ए : बंगलादेश, आयरल्यान्ड, पिएनजी, नामिबिया, अमेरिका
समूह बी : स्कटल्यान्ड, थाइल्यान्ड, जिम्बावे, नेदरल्यान्ड्स, नेपाल
विश्वकप छनोटमा नेपालको खेल
नेपाल भर्सेस थाइल्यान्ड – त्रिवि मैदान – माघ ४
नेपाल भर्सेस नेदरल्यान्ड्स -त्रिवि मैदान– माघ ८
नेपाल भर्सेस जिम्बावे – त्रिवि मैदान – माघ १०
नेपाल भर्सेस स्कटल्यान्ड – त्रिवि मैदान – माघ १२
-1746009348.jpg)
