बंगलादेश क्रिकेट बोर्ड (बिसिबी) ले २०२६ को टी-२० विश्वकप खेल्न आफ्नो टोली भारत नजाने अडान कायमै राखेको छ।
सुरक्षाको कारण देखाउँदै बंगलादेशले भारतमा हुने आफ्ना खेलहरू अन्य देशमा सार्न आग्रह गरेको छ।
मङ्गलबार अन्तर्राष्ट्रिय क्रिकेट परिषद (आइसिसी) सँग भएको भिडियो कुराकानीमा बंगलादेशले यो कुरा प्रष्ट पारेको हो।
सन् २०२६ को टी-२० विश्वकप भारत र श्रीलङ्काले मिलेर आयोजना गर्दैछन्, जुन फेब्रुअरी ७ देखि सुरु हुने तालिका छ। तय भएको तालिका अनुसार, बंगलादेशले आफ्ना सुरुका तीन खेल कोलकातामा र अन्तिम खेल मुम्बईमा नेपालसँग खेल्नुपर्ने छ।
बिसिबीले जारी गरेको विज्ञप्तिमा भनिएको छ, ‘छलफलका क्रममा हामीले भारत नजाने आफ्नो निर्णय फेरि दोहोर्याएका छौँ। सुरक्षाको चिन्ता भएकाले हाम्रा खेलहरू भारतभन्दा बाहिर सार्न आईसीसीलाई आग्रह गरेका छौँ।’
आइसिसीले भने खेलको तालिका सार्वजनिक भइसकेको भन्दै बंगलादेशलाई आफ्नो निर्णयमाथि पुनर्विचार गर्न भनेको छ। तर, बंगलादेश आफ्नो अडानबाट पछि हटेको छैन।
यो समस्या कसरी सुल्झाउने भन्नेबारे दुवै पक्षबीच थप छलफल हुने भएको छ। बंगलादेशले आफ्ना खेलाडी, कर्मचारी र अफिसियलहरूको सुरक्षा नै आफ्नो पहिलो प्राथमिकता भएको बताएको छ।
यो बैठकमा बंगलादेश क्रिकेट बोर्डका अध्यक्ष अमिनुल इस्लाम, उपाध्यक्षहरू, क्रिकेट अपरेसन कमिटीका सभापति र प्रमुख कार्यकारी अधिकृत (सिइओ) सहभागी थिए।
-1746009348.jpg)
