इटालीले सन् २०२६ को टी-२० विश्वकपका लागि वेन म्याडसनको कप्तानीमा १५ सदस्यीय टोली घोषणा गरेको छ। इटालीका लागि यो पहिलो विश्वकप सहभागिता हो।
यसअघि छनोट चरणमा टोलीको नेतृत्व गरेका अस्ट्रेलियाका पूर्व खेलाडी जो बर्न्सलाई कप्तानीबाट हटाउँदै टोलीबाट समेत निकालिएपछि म्याडसनलाई नयाँ जिम्मेवारी दिइएको हो।
टोलीमा दक्षिण अफ्रिकाका पूर्व अन्तर्राष्ट्रिय खेलाडी जेजे स्मट्स पनि सामेल छन्। इटालीको टोलीमा दुई जोडी दाजुभाइ परेका छन्। ह्यारी र बेन्जामिन मानेन्टी तथा एन्थोनी र जस्टिन मोस्का गरी दुई जोडी दाजुभाइ टोलीमा परेका हुन्।
टोलीको मुख्य प्रशिक्षकमा जोन डेभिसन छन् भने केभिन ओ'ब्रायन र डगी ब्राउन सहायक प्रशिक्षकका रूपमा रहेका छन्।
इटालीले गत वर्ष भएको युरोप क्षेत्रीय छनोटमा नेदरल्यान्ड्सपछि दोस्रो स्थान हासिल गर्दै विश्वकपमा आफ्नो स्थान सुरक्षित गरेको थियो।
विश्वकपमा इटाली समूह 'सी' मा रहेको छ। यस समूहमा नेपाल, बंगलादेश, इङ्ल्यान्ड र वेस्ट इन्डिज रहेका छन्।
इटालीका खेलहरू:
१. फेब्रुअरी ९: बंगलादेश विरुद्ध (कोलकाता)
२. फेब्रुअरी १२: नेपाल विरुद्ध (मुम्बई)
३. फेब्रुअरी १६: इङ्ल्यान्ड विरुद्ध (कोलकाता)
४. फेब्रुअरी १९: वेस्ट इन्डिज विरुद्ध (कोलकाता)
सन् २०२६ फेब्रुअरी ७ देखि मार्च ८ सम्म चल्ने यस विश्वकपमा २० टोली सहभागी हुनेछन्। २० टोलीलाई ५–५ वटाका दरले चार समूहमा बाँडिएको छ। प्रत्येक समूहका शीर्ष दुई टोली 'सुपर एट' चरणमा पुग्नेछन्। त्यसपछि सेमिफाइनल र फाइनल खेलहरू हुनेछन्।
इटालीको टोली:
वेन म्याडसन (कप्तान), जैन अली, मार्कस क्याम्पोपियानो (विकेटकिपर), अली हसन, कृषण कालुगामागे, ह्यारी मानेन्टी, बेन्जामिन मानेन्टी, जियान पिएरो मेडे, एन्थोनी मोस्का, जस्टिन मोस्का, सैयद नकवी, जसप्रीत सिंह, जेजे स्मट्स, ग्रान्ट स्टुअर्ट र थोमस ड्राका।
-1746009348.jpg)
