आइसिसी वुमन्स टी-२० विश्वकप छनोट प्रतियोगिताको पहिलो खेलमा नेपाल पराजित भएको छ।
आइतबार कीर्तिपुरस्थित त्रिवि मैदानमा भएको खेलमा नेपालमाथि थाइल्यान्डले ८ विकेटको जित निकालेको हो।
नेपालले दिएको १२३ रनको लक्ष्य थाइल्यान्डले १६.५ ओभरमा २ विकेट गुमाएर पूरा गरेको हो।
थाइल्यान्डका लागि नात्थाकन चन्थनले अर्धशतक प्रहार गरिन्। उनले ३९ बलमा ९ चौका र १ छक्काको मद्दतमा नटआउट ५७ रन बनाइन्। त्यसअघि अर्की ओपनर अभिसारले ३२ बलमा २८ रन बनाएकी थिइन्। उनलाई नेपालकी सीता रानामगरले बोल्ड गरेकी थिइन्।
३२ रन बनाएकी नन्थापतलाई पनि सीताले नै एलबिडब्लूको धरापमा पारिन्। उनले २५ बल खेल्दा ६ चौका प्रहार गरेकी थिइन्।
त्यसअघि टस जितेको थाइल्यान्डले फिल्डिङ रोजेपछि पहिले ब्याटिङ गरेको नेपाल २० ओभरमा १२२ रनमा अलआउट भयो।
नेपालका लागि ओपनर विन्दू रावलले ४४ रन र सम्झना खड्काले २६ रन जोडे पनि अरु ब्याटर सस्तैमा आउट भएका थिए।
विन्दू र सम्झनाले पहिलो विकेटका लागि ५.४ ओभरमा ५२ रनको साझेदारी गरेका थिए। विन्दूले ५६ बलमा ६ चौका प्रहार गर्दा सम्झनाले ११ बल खेल्दा ६ चौका प्रहार गरेर आक्रामक सुरुवात गरेकी थिइन्।
विन्दू १४ ओभरमा आउट हुँदा ८७ रन जोडेको नेपालले थप ८ विकेट बाँकी ६ ओभरमा गुमाउँदा ३५ रन मात्र जोड्न सकेको थियो। नेपालका पूजा महतो १२ रन, कप्तान इन्दू बर्मा ६ रन, कविता जोशी ३ रन, कविता कुँवर २ रन, रुबिना क्षेत्री १७ रन, सीता मगर ० र रिया शर्मा ४ रनमा आउट भएका थिए।
बलिङमा थाइल्यान्डका थिपाचाले ४ विकेट लिइन्।
आजदेखि सुरु भएको प्रतियोगितामा दश टोली छन् भनेशीर्ष चार टोली सन् २०२६ को जुनमा इंग्ल्यान्ड र वेल्समा हुने टी-२० विश्वकपमा पुग्नेछन्।
समूह बीममा नेपालले स्कटल्यान्ड, थाइल्यान्ड, जिम्बावे र नेदरल्यान्ड्ससँग प्रतिस्पर्धा गर्नेछ। छनोटमा १० देश सहभागी हुनेछन्। तीमध्ये शीर्ष चार देश इङल्याण्ड र वेल्समामा सन् २०२६ को जुनमा हुने महिला टी-२० विश्वकपमा छनोट हुनेछन्। समूहमा शीर्ष तीन-तीन टोली सुपर सिक्समा पुग्नेछन्। सुपर सिक्सबाट शीर्ष चार टोली विश्वकपमा पुग्नेछन्।
समूह ए : बंगलादेश, आयरल्यान्ड, पिएनजी, नामिबिया, अमेरिका
समूह बी : स्कटल्यान्ड, थाइल्यान्ड, जिम्बावे, नेदरल्यान्ड्स, नेपाल
विश्वकप छनोटमा नेपालको खेल
नेपाल भर्सेस थाइल्यान्ड – त्रिवि मैदान – माघ ४
नेपाल भर्सेस नेदरल्यान्ड्स -त्रिवि मैदान– माघ ८
नेपाल भर्सेस जिम्बावे – त्रिवि मैदान – माघ १०
नेपाल भर्सेस स्कटल्यान्ड – त्रिवि मैदान – माघ १२
-1746009348.jpg)
