पाकिस्तानले टी-२० विश्वकप २०२६ का लागि १५ सदस्यीय राष्ट्रिय टोलीको घोषणा गरेको छ।
बंगलादेशको बहिर्गमनपछि पाकिस्तान क्रिकेट बोर्डका अध्यक्ष मोहसिन नक्भीले पाकिस्तानको सहभागितालाई लिएर अन्योल व्यक्त गरेका थिए।
त्यसको भोलिपल्टै बोर्डले टी-२० विश्वकपका लागि राष्ट्रिय टोली सार्वजनिक गरेको हो।
मुख्य छनोटकर्ता आकिब जावेदले टोली घोषणा गर्नु र प्रतियोगितामा भाग लिनु फरक कुरा भएको बताएका छन्। उनले भने, ‘हाम्रो काम टोली छान्ने हो, जुन हामीले समय सीमाभित्रै गरेका छौँ। प्रतियोगिता खेल्ने वा नखेल्ने निर्णय सरकारले गर्नेछ।’
बिग ब्यास लिगमा धेरै विकेट लिए पनि ह्यारिस रउफ विश्वकप टोलीमा परेनन्। सेप्टेम्बरमा भारतविरुद्धको एसिया कपको फाइनलमा महँगो सावित भएपछि उनी छनोटकर्ताको प्राथमिकताबाट बाहिरिएको बुझिएको छ।
बिबिएलमा खराब ब्याटिङ प्रदर्शनका बाबजुद बाबर आजमले टोलीमा स्थान बनाएका छन्। यो उनको चौथो टी-२० विश्वकप हुनेछ। यसपटक उनी कप्तानको रूपमा ब्याटरको रूपमा मैदान उत्रिनेछन्। टोलीको कप्तानी सलमान अली आगाले गर्नेछन्।
श्रीलंकाको मैदान र पिचलाई ध्यानमा राख्दै पाकिस्तानले टोलीमा स्पिनरहरूको संख्या बढाएको छ। टोलीमा शादाब खान, मोहम्मद नवाज, अबरार अहमद र उस्मान तारिक जस्ता चार मुख्य स्पिनरहरू छन्। तीव्र बलतर्फ शाहिन अफ्रिदी, सलमान मिर्जा र नसिम शाह मात्र रहेका छन्।
पाकिस्तानले विश्वकपको पहिलो खेल फेब्रुअरी ७ मा नेदरल्याण्ड्स विरुद्ध कोलम्बोमा खेल्ने तालिका छ।
पाकिस्तानको १५ सदस्यीय विश्वकप टोली:
सलमान अली आगा (कप्तान), अबरार अहमद, बाबर आजम, फहिम अशरफ, फखर जमान, ख्वाजा नाफे (विकेटकिपर), मोहम्मद नवाज, सलमान मिर्जा, नसिम शाह, साहिबजादा फरहान (विकेटकिपर), साम अयुब, शाहिन शाह अफ्रिदी, शादाब खान, उस्मान खान (विकेटकिपर) र उस्मान तारिक।
-1746009348.jpg)
