आइसिसी टी-२० विश्वकप २०२६ को अन्तिम तयारीका लागि नेपाली टोली मुम्बईमा छ। श्रीलंकाको ए टोलीसँग तीन अभ्यास खेल खेलेपछि मुम्बईमा पुगेको नेपाली टोलीले त्यहाँ एक साता अभ्यास गर्नेछ।
भारतको मुम्बईमा तयारी गर्ने क्रममा नेपालले मुम्बईको एमसीए प्रेसिडेन्ट ११ विरुद्ध तीन अभ्यास टी-२० खेलहरूको सिरिज खेल्ने तालिका छ। मुम्बईमा पहिलो अभ्यास खेल माघ १५ मा हुनेछ।
मुम्बई पुगेपछि नेपाली टोलीका कप्तान रोहितकुमार पौडेलले नेपाली टोली सन्तुलित भएकाले आफू खुसी भएको बताएका छन्।
‘म धेरै खुसी छु, टोली एकदमै सन्तुलित देखिएको छ। कसैको लागि यो पहिलो विश्वकप हो भने कसैको लागि यो तेस्रो विश्वकप हो, त्यसैले तयारी निकै राम्रो भएको छ,’ उनले भने।
उनले विश्वकपअघि हुने वार्म अप खेलले नेपाली टोलीलाई थप अनुभव प्राप्त गर्ने मौका मिल्न पनि बताए। नेपालले विश्वकपअघि युएई र क्यानडासँग वार्म अप म्याच खेल्नेछ।
नेपालले पहिलो वार्म अप खेल माघ २० गते युएईसँग र दोस्रो खेल क्यानडासँग माघ २२ मा खेल्नेछ। दुवै खेल चेन्नईको एमए चिदाबरम रंगशालामा हुनेछ । यी खेलपछि नेपाली टोली फेरि मुम्बई फर्कनेछ।
‘अब टी-२० विश्वकपको तयारीका लागि वार्म-अप खेल हुनेछन्। मलाई लाग्छ, विश्वकपअघि यो राम्रो अनुभव र अवसर (एक्सपोजर) हुनेछ। हामी सबैजना निकै उत्साहित छौँ,’ उनले भने।
हाल नेपाली टोली बलिङ प्रशिक्षक इयान हार्भेले मुख्य प्रशिक्षक स्टुअर्ट लसँग मिलेर काम गरिरहेका छन्।
‘उहाँसँग पनि राम्रो अनुभव छ। उहाँको अनुभवले गर्दा हामीले विश्वकपमा उत्कृष्ट क्रिकेट खेल्नेछौँ भन्ने मलाई लाग्छ,’ प्रशिक्षकबारे रोहितको भनाइ छ।
नेपालले यसपटकको विश्वकपमा लगाउने जर्सी र सन् २०१४ को जर्सी उस्तै प्रकार छ। यो जर्सी देखेर आफू भावुक भएको रोहितले बताए।
‘सन् २०१४ को विश्वकप नवलपारसीको घरमा बसेर हेरेको थिएँ। यस्तै जर्सी थियो। उस्तै जर्सी देख्दा एकदमै भावुक भएँ,’ रोहितले नेपाल क्रिकेट संघसँग कुरा गर्दै भनेका छन्।
सबैले २०२६ को टी-२० विश्वकप खेल्ने अपेक्षा गरेको र स्वभावैले विश्वकप छनोटमा अपेक्षासँगै दबाब भएको उनको भनाइ छ। टोलीले सबै दबाबलाई झेल्दै छनोट भएको पनि उनले बताए।
उनले नेपाली फ्यानलाई सम्बोधन गर्दै भने, ‘सन् २०२६ को विश्वकपमा हामी मैदानमा आफ्नो शतप्रतिशत भन्दा बढी (११० प्रतिशत) योगदान दिनेछौँ र नेपाल एवं हाम्रा सम्पूर्ण फ्यानलाई गौरवान्वित बनाउनेछौँ।’
नेपाली टोली
रोहित पौडेल (कप्तान) र उपकप्तान दीपेन्द्र सिंह ऐरी (उपकप्तान) सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, सोमपाल कामी, करण केसी, नन्दन यादव, गुल्शन झा, ललित राजवंशी, शेर मल्ल र लोकेश बम।
यसपटकको विश्वकपमा नेपाल समूह ‘सी’ मा छ। यो समूहमा नेपालसँगै इंग्ल्यान्ड, वेस्ट इन्डिज, स्कटल्यान्ड र इटाली छन्।
नेपालले पहिलो खेल इंग्ल्यान्डसँग फेब्रुअरी ८ मा (माघ २५) खेल्नेछ। अन्तिम खेल स्कटल्यान्डसँग फेब्रुअरी १७ (फागुन ५) मा हुनेछ। नेपालका चारै खेलमा मुम्बईमा हुनेछन्। समूहमा शीर्ष दुईमा परेमा सुपर-८ मा पुग्ने सम्भावना हुनेछ।
नेपाल रहेको समूह सी
इंग्ल्यान्ड, वेस्ट इन्डिज, स्कटल्यान्ड, इटाली, नेपाल
नेपालको विश्वकपमा खेल
नेपाल भर्सेस इंग्ल्यान्ड, ८ फेब्रुअरी (माघ २५), दिउँस ३ बजे, मुम्बई
नेपाल भर्सेस इटाली, १२ फेब्रुअरी(माघ २९), दिउँस ३ बजे, मुम्बई
नेपाल भर्सेस वेस्ट इन्डिज, १५ फेब्रुअरी (फागुन ३), विहान ११ बजे, मुम्बई
नेपाल भर्सेस स्कटल्यान्ड, १७ फेब्रुअरी (फागुन ५), राति ७ बजे, मुम्बई
-1746009348.jpg)
