सन् २००७ मा दक्षिण अफ्रिकामा आयोजित पहिलो टी-२० विश्वकपमा भारत विजयी भएसँगै क्रिकेटमा एउटा नयाँ युगको सुरुवात भएको थियो। टी-२० विश्वकप त्यो ऐतिहासिक पलबाट झण्डै दुई दशक अगाडि आइसकेको छ।
पहिलो प्रतियोगितामा १२ टोलीले प्रतिस्पर्धा गरेका थिए भने सन् २०२६ मा हुने १०औँ संस्करणमा विश्वभरका २० टोली सहभागी हुनेछन्। अहिलेसम्म छ वटा फरक देशले यो उपाधि जितेका छन्, जसमा वेस्ट इन्डिज, इंग्ल्यान्ड र वर्तमान विजेता भारतले मात्र दुई-दुई पटक ट्रफी उचाल्न सफल भएका छन्। श्रीलंका, पाकिस्तान र अस्ट्रेलियाले एक एक पटक विश्वकप जितेका छन्।
२१औँ शताब्दीमा टी-२० क्रिकेट खेलकुदकै सबैभन्दा तीव्र गतिमा फैलिरहेको विधा बनेको छ। सुरुमा सन् २००३ मा इंग्ल्यान्डको घरेलु क्रिकेटमा यसलाई ल्याइँदा धेरैले शंका गरेका थिए। तर, नयाँ दर्शक तान्न र खेललाई सरल बनाउन ल्याइएको यो स्वरूप छोटो समयमै विश्वभर लोकप्रिय भयो।
सन् २००७ को पहिलो विश्वकपले टी-२० लाई अर्कै उचाइमा पुर्यायो। वेस्ट इन्डिजका क्रिस गेलले पहिलो खेलमै शतक प्रहार गरेर धमाका मच्चाए। युवराज सिंहले स्टुअर्ट ब्रोडको एकै ओभरमा ६ छक्का प्रहार गरेको र फाइनलमा मिसबाह-उल-हकको 'स्कुप' सट जस्ता क्षणहरूले यो प्रतियोगितालाई स्मरणीय बनाए। फाइनलमा भारतले पाकिस्तानलाई नाटकीय रूपमा हराउँदै नयाँ इतिहास रच्यो।
सन् २००९ मा पाकिस्तानले भारतसँगको अघिल्लो हारको बदला लिँदै उपाधि जित्यो। शाहिद अफ्रिदीले उत्कृष्ट प्रदर्शन गरे। सोही वर्ष नेदरल्याण्ड्सले आयोजक इंग्ल्यान्डलाई हराएर ठूलो नतिजा निकालेको थियो।
सन् २०१० मा इंग्ल्यान्डले वेस्ट इन्डिजमा भएको प्रतियोगिता जितेर आफ्नो पहिलो सीमित ओभरको विश्वकप उपाधि उचाल्यो।
सन् २०१२ मा वेस्ट इन्डिजले श्रीलंकालाई उसकै मैदानमा हराएर पहिलो पटक उपाधि जित्यो।
सन् २०१४ मा बंगलादेशमा भएको विश्वकपमा श्रीलंकाले फाइनलमा भारतलाई हराउँदै उपाधि जित्यो। जससँगै कुमार सांगाकारा र महेला जयवर्धनेको लागि सानदार बिदाइ सावित भयो।
सन् २०१६ मा कार्लोस ब्राथवेटले अन्तिम ओभरमा लगातार चार छक्का प्रहार गरेपछि वेस्ट इन्डिज दोस्रो पटक च्याम्पियन बन्यो।
सन् २०२१ मा पाँच वर्षको अन्तरालपछि भएको विश्वकपमा अस्ट्रेलियाले पहिलो पटक उपाधि जित्यो।
सन् २०२२ इंग्ल्यान्डले पाकिस्तानलाई हराउँदै दोस्रो पटक टी-२० विश्वकप जित्यो र एकैसाथ एकदिवसीय र टी-२० दुवैको विश्वविजेता बन्यो।
सन् २०२४ मा यो प्रतियोगिता २० टोलीबीच खेलियो। अमेरिका, क्यानडा र युगान्डाले पहिलो पटक भाग लिए। सह-आयोजक अमेरिकाले पाकिस्तानलाई हराएर सबैलाई चकित पार्यो भने अफगानिस्तान पहिलो पटक सेमिफाइनलसम्म पुग्यो।
फाइनलमा विराट कोहलीको ७६ रन र जसप्रित बुमराहको उत्कृष्ट बलिङको मद्दतले भारतले दक्षिण अफ्रिकालाई ७ रनले हराउँदै दोस्रो पटक उपाधि जित्यो। यससँगै विराट कोहली र रोहित शर्माले अन्तर्राष्ट्रिय टी-२० बाट संन्यास लिए।
अब सन् २०२६ भारत र श्रीलंकामा हुने आगामी विश्वकपमा इटालीले पहिलो पटक डेब्यु गर्दै आफ्नो यात्रा सुरु गर्नेछ।
यो विश्वकपमा नेपालले तेस्रो पटक विश्वकप खेल्दैछ। सन् २०१४ मा बंगलादेशमा पहिलो पटक विश्वकप खेलेको नेपालले सन् २०२४ पछि दोस्रो पटक विश्वकप खेलेको थियो।
नेपालले समूह ‘सी’ मा पूर्वविजेताद्वय इंग्ल्यान्ड र वेस्ट इन्डिजसँगै इटाली र स्कटल्यान्डसँग प्रतिस्पर्धा गर्नेछ।
प्रत्येक समूहका शीर्ष दुई टोलीहरू 'सुपर ८' चरणमा प्रवेश गर्नेछन्। नेपालका लागि इंग्ल्यान्ड वा वेस्ट इन्डिज जस्ता बलिया टोलीलाई हराउन सकेमा इतिहास रच्ने अवसर हुनेछ।
समूह ‘ए’ - भारत, पाकिस्तान, संयुक्त राज्य अमेरिका, नेदरल्याण्ड्स, नामिबिया
समूह ‘बी’- अस्ट्रेलिया, श्रीलंका, आयरल्याण्ड, जिम्बाब्वे, ओमान
समूह ‘सी’ – इंग्ल्यान्ड, वेस्ट इन्डिज, नेपाल, इटाली, स्कटल्याण्ड
समूह ‘डी’- न्यूजिल्याण्ड, दक्षिण अफ्रिका, अफगानिस्तान, क्यानडा, संयुक्त अरब इमिरेट्स
-1746009348.jpg)
