आइसिसी टी-२० विश्वकप २०२६ अर्को सातादेखि भारत र श्रीलंकामा सुरू हुँदैछ। यो विश्वकपको दशौं संस्करण हो।
यसअघिका नौ संस्करणमा तीन टोलीले दुई-दुई पटक उपााधि जितेका छन्। तीन टोलीको नाममा एकपटक उपाधि जितेको इतिहास छ।
अहिलेसम्म छ वटा फरक देशले यो उपाधि जितेका छन्। जसमा वेस्ट इन्डिज, इंग्ल्यान्ड र वर्तमान विजेता भारतले मात्र दुई-दुई पटक ट्रफी उचाल्न सफल भएका छन्। श्रीलंका, पाकिस्तान र अस्ट्रेलियाले एक एक पटक विश्वकप जितेका छन्।
अहिलेसम्मका नौ संस्करणमा कुन कुन खेलाडीले उत्कृष्ट प्रदर्शन गरेका छन् पढ्नहोस् :-
२००७ – युवराज सिंहको ६ छक्का
दक्षिण अफ्रिकामा भएको पहिलो विश्वकपमा भारतका युवराज सिंहले स्टुअर्ट ब्रोडको एकै ओभरमा ६ छक्का प्रहार गरेर इतिहास रचे।
उनी टी-२० क्रिकेटमा यो सफलता पाउने पहिलो खेलाडी बने। उनले मात्र १२ बलमा अर्धशतक बनाएर विश्व कीर्तिमान कायम गरे, जुन सन् २०२३ सम्म कसैले तोड्न सकेको थिएन। भारतले सोही वर्ष पाकिस्तानलाई फाइनलमा हराएर उपाधि जितेको थियो।
२००९ – शाहिद अफ्रिदीको अलराउन्ड खेल
सन् २००७ मा 'प्लेयर अफ द टूर्नामेन्ट' बनेका पाकिस्तानका शाहिद अफ्रिदीले २००९ को सेमिफाइनलमा दक्षिण अफ्रिकाविरुद्ध सानदार खेल देखाए।
उनले ब्याटिङमा ५१ रन बनाए भने बलिङमा १६ रन दिएर २ महत्त्वपूर्ण विकेट लिए। उनकै उत्कृष्ट प्रदर्शनले पाकिस्तानलाई फाइनलमा पुर्यायो र अन्ततः उपाधि जिताउन मद्दत गर्यो।
२०१० – माइकल हसीको सनसनीपूर्ण ब्याटिङ
वेस्ट इन्डिजमा भएको २०१० को विश्वकपमा अष्ट्रेलियाका माइकल हसीले पाकिस्तानविरुद्धको सेमिफाइनलमा अविश्वसनीय इनिङ खेले। उनले मात्र २४ बलमा अविजित ६० रन बनाए।
अन्तिम ओभरमा जितका लागि १८ रन चाहिएको बेला उनले सईद अजमललाई तीन छक्का र एक चौका प्रहार गर्दै एक बल बाँकी छँदै अष्ट्रेलियालाई जिताए।
२०१२ – सुनिल नरेनको जादुमयी बलिङ
वेस्ट इन्डिजलाई पहिलो पटक टी-२० विश्वकप उपाधि दिलाउन स्पिनर सुनिल नरेनले फाइनलमा घातक बलिङ गरे। उनले श्रीलंकाविरुद्ध मात्र ९ रन खर्चेर ३ विकेट लिए। उनको कसिलो बलिङका कारण श्रीलंका १३८ रनको लक्ष्य पछ्याउने क्रममा ३६ रनले पराजित भयो।
२०१४ – रंगना हेराथको घातक बलिङ
न्युजिल्याण्डविरुद्धको महत्त्वपूर्ण खेलमा श्रीलंकाका स्पिनर रंगना हेराथले मात्र ३ रन दिएर ५ विकेट लिँदै विपक्षी टोलीलाई तहसनहस बनाए। श्रीलंकाले दिएको १२० रनको सामान्य लक्ष्य पछ्याएको न्युजिल्याण्ड हेराथको बलिङसामु टिक्न सकेन र मात्र ६० रनमा अलआउट भयो।
२०१६ – 'कार्लोस ब्रेथवेट! नाम याद राख्नुहोला!'
२०१६ को फाइनलमा वेस्ट इन्डिजलाई जितका लागि अन्तिम ओभरमा १९ रन आवश्यक थियो। ब्रेथवेटले इंग्ल्याण्डका बेन स्टोक्सको सुरुवाती चार बलमा लगातार चार छक्का प्रहार गर्दै असम्भव लाग्ने जित दिलाए। कमेन्टेटर इयान बिशपले भनेको 'कार्लोस ब्रेथवेट! रिमेम्बर द नेम!' भन्ने वाक्य क्रिकेट इतिहासमै अमर बन्यो।
२०२१ – मिचेल मार्सको उत्कृष्ट इनिङ
२०२१ को फाइनलमा अष्ट्रेलियाका मिचेल मार्सले न्युजिल्याण्डविरुद्ध अविजित ७७ रन बनाउँदै टोलीलाई पहिलो पटक टी-२० विश्वकपको उपाधि दिलाए। उनले डेभिड वार्नरसँग मिलेर अष्ट्रेलियाको इनिङ सम्हालेका थिए र टोलीलाई ८ विकेटको सहज जित दिलाए।
२०२२ – बेन स्टोक्सको पुनरागमन
२०१६ को पीडालाई बिर्साउँदै बेन स्टोक्सले २०२२ को फाइनलमा पाकिस्तानविरुद्ध धैर्यपूर्ण ५२ रन बनाएर इंग्ल्याण्डलाई दोस्रो पटक विश्व विजेता बनाए। साम करनको घातक बलिङ (३-१२) पछि स्टोक्सको ब्याटिङले इंग्ल्याण्डलाई एक ओभर बाँकी छँदै लक्ष्यमा पुर्यायो।
२०२४ – विराट कोहलीको उत्कृष्ट विदाइ
२०२४ को फाइनलमा दक्षिण अफ्रिकाविरुद्ध भारत संकटमा परेको बेला विराट कोहलीले ७६ रनको जिम्मेवार इनिङ खेले। ३४ रनमा ३ विकेट गुमेको अवस्थामा कोहलीले भारतलाई १७६ रनको बलियो स्कोरसम्म पुर्याए। भारतले ७ रनको रोमाञ्चक जित हात पार्यो र आफ्नो अन्तिम टी-२० अन्तर्राष्ट्रिय खेलमा कोहली 'प्लेयर अफ द म्याच' चुनिए।
-1746009348.jpg)
