मेरिलिबोन क्रिकेट क्लब (एमसिसी) ले क्रिकेटका नियममा विभिन्न महत्वपूर्ण परिवर्तनहरू गरेको छ। यी नियम सन् २०२६ को अक्टोबर १ देखि लागू हुनेछन्।
अहिलेको नियम अनुसार टेस्ट वा बहुदिवसीय खेलमा दिनको खेल सकिनै लाग्दा (अन्तिम ओभरमा) विकेट गयो भने खेल त्यहीँ रोकिन्छ र नयाँ ब्याटर अर्को दिन मात्र आउँछन्। तर अब नयाँ नियम अनुसार विकेट गए पनि ओभर पूरा गर्नुपर्नेछ र नयाँ ब्याटर मैदानमा छिर्नैपर्छ। बलिङ गर्ने टोलीलाई मर्का नपरोस् तथा खेलको रोमाञ्चकता कायम रहोस् भनेर यो नियम ल्याइएको हो।
अहिले राम्रो गुणस्तरको 'विलो' काठ पाउन गाह्रो र महँगो हुँदै गएको छ। त्यसैले सर्वसाधारणले खेल्ने क्रिकेटमा अब धेरै टुक्रा काठहरू जोडेर बनाइएको 'ल्यामिनेटेड' ब्याट प्रयोग गर्न पाइनेछ। यसले ब्याटको मूल्य घटाउन मद्दत गर्नेछ। यस्ता ब्याटले खेलको प्रदर्शनमा भने खासै फरक पार्ने छैनन्।
हिट विकेटबारे अहिले केही अन्योल थियो। जसलाई अब प्रस्ट पारिएको छ। यदि ब्याटरले सट खेल्दा वा बल सामना गर्दा आफ्नो सन्तुलन गुमाउँछ र त्यस क्रममा स्टम्पमा ठोकिन्छ भने ऊ आउट हुनेछ। बल धेरै टाढा पुगिसकेको भए पनि यदि सन्तुलन मिलाउन नसकेर स्टम्प लड्यो भने त्यो 'हिट विकेट' नै मानिनेछ।
तर, यदि फिल्डरसँग ठोक्किएर वा फिल्डरले धकेलेर स्टम्पमा लाग्यो भने चाहिँ आउट दिइने छैन। यदि ब्याटरको हातबाट ब्याट फुत्किएर सिधै स्टम्पमा लाग्यो भने आउट हुन्छ, तर ब्याट पहिले विकेटकिपरलाई लागेर अनि मात्र स्टम्पमा लाग्यो भने 'नट आउट' हुनेछ।
ओभरथ्रो र मिसफिल्ड (बल समात्न नसक्नु) बीचको भिन्नतालाई अब स्पष्ट पारिएको छ। यदि फिल्डरले रनआउट गर्न वा रन रोक्नका लागि स्टम्पतिर बल फाल्छ र त्यो बल कतै ठोकिएर वा कसैले समात्न नसकी टाढा जान्छ भने मात्र त्यसलाई 'ओभरथ्रो' भनिनेछ। बाउन्ड्री लाइनमा बल रोक्न खोज्दा हातबाट फुत्किनुलाई अब ओभरथ्रो भनिने छैन।
पहिले बल बलर वा विकेटकिपरको हातमा पुगेपछि मात्र बल 'डेड' भएको मानिन्थ्यो। अब अम्पायरलाई बढी अधिकार दिइएको छ। यदि बल कुनै पनि फिल्डरको हातमा छ वा भुइँमा स्थिर छ र कसैले पनि खेल अघि बढाउने कोसिस गरिरहेका छैनन् भने अम्पायरले त्यसलाई 'डेड बल' घोषणा गर्न सक्नेछन्।
एमसिसी ७३ वटा साना-ठूला परिवर्तनहरू सार्वजनिक गरेको भए पनि अन्तर्राष्ट्रिय क्रिकेटमा लागू गर्नका लागि अन्तर्राष्ट्रिय क्रिकेट परिषदले यसलाई अनुमोदन गर्नुपर्नेछ। यी नियमहरू मुख्य रूपमा सन् २०२६ को अक्टोबर १ बाट लागू हुनेछन्।
नेपाल जस्ता देशका क्रिकेट संघहरूले आफ्नो आन्तरिक खेलमा यी नियम लागू गर्ने कि नगर्ने भन्ने निर्णय आफैं गर्न पाउनेछन्।
-1746009348.jpg)
