शनिबारदेखि सुरु हुने आइसिसी पुरुष टी-२० विश्वकप २०२६ मा समूह 'सी' निकै रोचक र प्रतिस्पर्धात्मक हुने देखिएको छ।
यस समूहमा पूर्व विजेतादेखि पहिलोपटक विश्वकप खेल्न लागेका टोलीसम्म सामेल छन्।
समूहमा रहेका इंग्ल्यान्ड र वेस्ट इन्डिज पूर्वविजेता हुन्। बंगलादेशले भाग सुरक्षाका कारण भारतमा नखेल्ने भएपछि वरीयताको आधारमा मौका पाएको स्टल्यान्डले सातौं पटक विश्वकप खेल्दैछ।
नेपालले तेस्रो पटक विश्वकप खेल्न लागेको हो। यसअघि नेपालले सन् २०१४ र २०२४ मा पनि विश्वकप खेलेको थियो। यता समूहमा रहेको इटालीले टी-२० विश्वकपमा डेब्यू गर्दैछ।
समूह 'सी' का टोली
यस समूहमा इंग्ल्यान्ड, वेस्ट इन्डिज, इटाली, नेपाल र स्कटल्याण्ड रहेका छन्।
मुख्य आकर्षण : इंग्ल्यान्ड र वेस्ट इन्डिज
इंग्ल्यान्ड र वेस्ट इन्डिज दुवैले यो प्रतियोगिता दुई-दुई पटक जितिसकेका छन्। यी दुई टोलीबीचको भिडन्त सधैं ऐतिहासिक र रोमाञ्चक हुने गर्दछ। तर यो समूहमा यी दुई टोली मात्र होइन, अन्य टोलीका पनि आफ्नै रोचक कथाहरू छन्।
इटालीले पहिलो पटक टी-२० विश्वकप खेल्दैछ। छनोट चरणमा उत्कृष्ट प्रदर्शन गर्दै इटालीले सबैलाई चकित पारेको थियो।
इंग्ल्यान्ड यो समूहको सबैभन्दा बलियो टोली हो। आइसिसी वरीयतामा तेस्रो स्थानमा रहेको यो टोलीमा उत्कृष्ट खेलाडीहरूको जमघट छ।
हेर्नलायक खेलाडी: आदिल राशिद (इंग्ल्यान्ड)
भारत र श्रीलंकाको स्पिनमैत्री पिचमा अनुभवी स्पिनर आदिल राशिद इंग्ल्यान्डका मुख्य हतियार हुनेछन्। उनी हाल टी-२० वरीयताको चौथो स्थानमा छन्। कप्तान ह्यारी ब्रुकले कठिन समयमा राशिदमाथि नै भरोसा गर्नेछन्।
इंग्ल्यान्ड
कप्तान: ह्यारी ब्रुक
मुख्य कुरा: इंग्ल्यान्डले सन् २०१० र २०२२ मा विश्वकप जितेको थियो। जोस बटलरबाट कप्तानी सम्हालेका ह्यारी ब्रुक र ओपनर फिल साल्ट आक्रामक ब्याटिङका लागि चिनिन्छन्। जोफ्रा आर्चरको पुनरागमन र साम करन जस्ता अलराउन्डरले टोलीलाई निकै सन्तुलित बनाएको छ।
वेस्ट इन्डिज
कप्तान: शाई होप
मुख्य कुरा: वेस्ट इन्डिजले पछिल्लो पटक सन् २०१६ मा विश्वकप जितेको थियो। त्यसपछि उनीहरूले ठूलो सफलता पाउन सकेका छैनन्। वेस्ट इन्डिजको खेल कहिले असाध्यै राम्रो त कहिले सोचेभन्दा कमजोर हुने गर्छ। शाई होप, ब्रान्डन किंग र शिमरोन हेटमायर जस्ता ब्याटरहरू लयमा हुनु उनीहरूका लागि महत्त्वपूर्ण छ।
इटाली
कप्तान: वेन म्याडसन
मुख्य कुरा: पहिलो पटक विश्वकप खेल्न लागेको इटालीले छनोट चरणमा स्कटल्याण्डलाई १२ रनले हराएर सनसनी मच्चाएको थियो। टोलीमा अस्ट्रेलियाको 'बिग ब्यास लिग' खेलेका मनेन्टी दाजुभाइ (ह्यारी र बेन मनेन्टी) जस्ता अनुभवी खेलाडीहरू छन्। ४२ वर्षीय कप्तान वेन म्याडसनले टोलीको नेतृत्व गर्नेछन्।
स्कटल्याण्ड
कप्तान: रिचर्ड बेरिंग्टन
मुख्य कुरा: बंगलादेशको ठाउँमा अन्तिम समयमा विश्वकपमा प्रवेश पाएको स्कटल्याण्ड यो अवसरलाई सदुपयोग गर्न चाहन्छ। कप्तान बेरिंग्टन र युवा ब्याटर ब्रान्डन म्याकमुलन टोलीका खम्बा हुन्। बलर मार्क वाट टी-२० आईमा १०० विकेट लिनबाट मात्र ११ विकेट टाढा छन्।
नेपाल
कप्तान: रोहित पौडेल
मुख्य कुरा: नेपाली टोली र यसका समर्थकहरू कुनै पनि ठूलो प्रतियोगितामा ऊर्जा थप्न माहिर मानिन्छन्। पूर्व अस्ट्रेलियन खेलाडी स्टुअर्ट ल को प्रशिक्षणमा रहेको नेपाली टोलीले ठूला प्रतियोगिताहरूमा सधैं कडा टक्कर दिँदै आएको छ।
उपकप्तान दीपेन्द्र सिंह ऐरीसँग टी-२० आईमा शतक बनाएको अनुभव मात्र छैन भने उनको नाममा छिटो अर्धशतकको रेकर्ड पनि छ। सन्दीप लामिछाने नेपालका मुख्य विकेट लिने बलर हुन्। उनले गत वर्ष मात्र २१ विकेट लिएका थिए।
समूह 'सी' मा इंग्ल्यान्ड र वेस्ट इन्डिज 'सुपर एट' मा पुग्ने बलिया दाबेदार हुन्। तर, नेपाल, स्कटल्याण्ड र इटालीले कुनै पनि बेला ठूला टोलीलाई हराएर उलटफेर गर्न सक्ने क्षमता राख्छन्। विशेष गरी दक्षिण एसियाली कन्डिसन (भारत र श्रीलंका) मा नेपालको प्रदर्शन कस्तो रहला भन्नेमा धेरैको चासो छ।
नेपालले पहिलो खेल इंग्ल्यान्डसँग फेब्रुअरी ८ मा (माघ २५) खेल्नेछ। अन्तिम खेल स्कटल्यान्डसँग फेब्रुअरी १७ (फागुन ५) मा हुनेछ। नेपालका चारै खेलमा मुम्बईमा हुनेछन्। समूहमा शीर्ष दुईमा परेमा सुपर-८ मा पुग्ने सम्भावना हुनेछ।
नेपाली टोली
रोहित पौडेल (कप्तान), दीपेन्द्रसिंह ऐरी (उपकप्तान) सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, सोमपाल कामी, करण केसी, नन्दन यादव, गुल्शन झा, ललित राजवंशी, शेर मल्ल र लोकेश बम।
नेपालको विश्वकपमा खेल
नेपाल भर्सेस इंग्ल्यान्ड, ८ फेब्रुअरी (माघ २५), दिउँस ३ बजे, मुम्बई
नेपाल भर्सेस इटाली, १२ फेब्रुअरी(माघ २९), दिउँस ३ बजे, मुम्बई
नेपाल भर्सेस वेस्ट इन्डिज, १५ फेब्रुअरी (फागुन ३), विहान ११ बजे, मुम्बई
नेपाल भर्सेस स्कटल्यान्ड, १७ फेब्रुअरी (फागुन ५), राति ७ बजे, मुम्बई
-1746009348.jpg)
