मुम्बईको ऐतिहासिक वानखेडे स्टेडियममा समूह 'सी' अन्तर्गतको खेलमा नेपाल र इंग्ल्यान्ड भिडिरहेका छन्।
नेपालविरूद्ध इंग्ल्यान्डले टस जिर ब्याटिङ गरिहरेको छ। खेलमा स्पिनर शेर मल्लले डेब्यू गरेका छन्।
राष्ट्रिय टोलीमा विश्वकपबाट खेल्दै डेब्यू गरेका शेरले आफ्नो पहिलो बलमै विकेट लिएका छन्। दोस्रो ओरभमा आफ्नो पहिलो स्पेल लिएर आएका शेरले फिल साल्टलाई सन्दीप लामिछानेबाट क्याच गराएका छन्। साल्टले एक रन मात्र बनाउन सके। तर यो ओभरमा उनी महँगो सावित भए। उनलाई जेकब बेथेल दुई चौका र एक छक्का प्रहार गरे।
नेपाल प्रिमियर लिगमा लुम्बिनी लायन्सका लागि उत्कृष्ट प्रदर्शन गरेका शेर मल्लले पहिलो पटक राष्ट्रिय टोलीमा स्थान बनाएका थिए। स्पिनर शेर टिमलाई चाहिएको बेलमा ब्याटिङ पनि गर्न सक्छन्।
उनको नेपाली क्रिकेट टोलीको यात्रा दोस्रो सिजनको नेपाल प्रिमियर लिग (एनपिएल) ले कोरेको हो। लुम्बिनी लायन्सलाई उपाधि जिताउने क्रममा महत्वपूर्ण प्रदर्शन गरेका मल्ललाई प्रतियोगिताको दौरान ‘मिस्ट्री’ स्पिनरको संज्ञा पाएका थिए।
स्पिनर मल्लले दोस्रो सिजनको एनपिएलमा लुम्बिनी लायन्सका लागि १० खेलमा १७ विकेट लिए। मल्ल एनपिएलका एक मात्र त्यस्ता खेलाडी बने जसले लगातार दोस्रो उपाधि जित्न सफल भए।
यो सिजन लुम्बिनीबाट उपाधि जित्दा अघिल्लो सिजन जनकपुर बोल्ट्सका लागि च्याम्पियनको यात्रा गरेका थिए। उनले दुई उपाधि जित्दा एउटा संयोग बन्यो- दुवै फाइनलमा आफ्नो घरेलु टोली सुदूरपश्चिमलाई हराउनु।
एनपिएलमा उदीयमान खेलाडी घोषित हुनुअघि उनले 'मिस्ट्री बलर'को उपमा पाएका थिए। पावरप्लेमा विकेट निकाल्ने र चाहिएको बेलमा ठूला सर्ट प्रहार गरेर रन बनाउन सक्ने क्षमता भएका उनको प्रशंसा भइरह्यो।
मल्ललाई भारतीय कमेन्टेटर आकाश चोपडाले आइपिएल खेल्न सक्ने बलरको रूपमा चित्रित गरेका थिए। काठमान्डु गोर्खाज तथा नेपाली राष्ट्रिय टोलीका पूर्वप्रशिक्षक मोन्टी देसाइले पनि उनको प्रशंसा गरेका थिए।
सन् २०१७ देखि घरेलु क्रिकेट सुदूरपश्चिमबाट खेलिरहेका मल्लले राष्ट्रिय टोलीमा स्थान बनाएपछि भनेका छन्, ‘भगवानको योजना, भगवान महान् छन्!’
मल्लको जन्म सुदुरपश्चिकको डोटी जिल्लाको केआइसिंह गाउँपालिकमा भएको हो। उनी बाल्लकालमा परिवारसँगै भारतको पञ्जाब पुगेका थिए। उनका बुवाआमा त्यहाँ काम गर्ने भएकाले उनलाई पनि सँगै लगेका थिए।
उनी पञ्जाबको क्रिकेट वातावरणमा हुर्किए। पञ्जाबको गल्लीहरुमा टेनिस बलले क्रिकेट खेले। त्यसपछि उनले स्कुलको क्रिकेट टोलीबाट खेल्न सुरु गरेका थिए। त्यहाँ जिल्लास्तरका क्रिकेट खेले।
जिल्लास्तरसम्म खेलेपछि उनको क्रिकेटमा मन बस्यो। अनि व्यावसायिक रूपमा क्रिकेट सिकेको उनी बताउँछन्। सुरुमा क्रिकेटको भविष्य नभएको भन्दै परिवारको समर्थन नपाएका उनलाई अहिले भने परिवारको पूरा साथ छ।
क्रिकेट खेल्न उनी २०७५ सालमा नेपाल आएका थिए।
‘२०७५ साल मा नेपाल आएको थिएँ। मैले भारतमा खेल्छु भन्ने थाहा पाएपछि सुवास शाही (धनगढी क्रिकेट एकेडेमीका अध्यक्ष) सरले कल गरेर बोलाउनुभयो। त्यतिखेर क्रिकेट बोर्ड थिएन, त्यो एउटा चुनौति थियो। तर मेहनत गर्छु भने केही न केही बाटो खुल्छ भनेर अघि बढेको थिएँ,’ मल्लले गत महिना एनपिएल जितेपछि धनगढीमा आयोजित एक कार्यक्रममा भनेका थिए।
नेपाल आएपछि स्थानीयस्तरदेखि उनले आफ्नो यात्रा सुरू गरे।
‘पाँच वर्षअघिको कुरा गर्नु पर्दा नेपालमा क्रिकेटमा केही पनि थिएन। न घरेलु क्रिकेट थियो, न केही अरू क्रिकेट थियो। हामीहरू धनगढीको लिटल फ्लावर प्रिमियर लिग खेल्थ्यौं, त्यसले चाहिँ मलाई एकदमै सहयोग गरेको थियो,’ उनले भने।
धनगढीको स्कुलले आयोजना गर्ने लिटल फ्लावर प्रिमियर लिगले प्रधानमन्त्री कपसम्मको यात्रा गर्न सहज भएको उनको अनुभव छ।
लिटल प्लावर लिग हुँदै सूदूरपश्चिमको सिनियर टोलीबाट प्रधानमन्त्री कप खेलेपछि उनी सबैको आँखामा परे।
त्यसपछि उनलाई पहिलो सिजनको नेपाल प्रिमियर लिगमा जनकपुरको टोलीमा पर्न सहज भयो।
पहिलो सिजनमा उत्कृष्ट खेलेर उपाधि जिते पनि जनकपुरको टोलीमा रिटेन भएनन्। तर दोस्रो सिजका लागि लुम्बिनीको टोलीमा अक्सनमार्फत आबद्ध हुन सफल भए।
‘यो सिजनको एनपिएल सुरू हुँदा एउटा म आफ्नो लक्ष्य लिएर गएको थिएँ। विशेषगरी आफ्नो डायरीहरूमा लेखेको थिएँ। ती कुराहरू सफल हुँदा खुसी लाग्छ। लाइफमा राम्रो हुँदा धेरै प्रोत्साहन पनि पाइन्छ र नराम्रो गर्दा गाली पनि पाइन्छ, म यो कुराहरूलाई एउटै स्थानमा राख्छु। मलाई लाग्छ मैले अझै केही गरेको छैन, यो मेहनतको नतिजा हो। अझै बढी मेहनत गर्नेछु। अप्स एन्ड डाउन (प्रदर्शनमा तल माथि) जे भए पनि यसरी नै सपोर्ट गर्नुहोला। मेरो बेस्ट (उत्कृष्ट) आउन अझै बाँकी छ,’ उनले एनपिएलको अनुभवसँगै आफ्नो लक्ष्य बताए।
‘नेपालको राष्ट्रिय टोलीका लागि खेल्नु गर्वको कुरा हो। र विश्वकप खेल्ने सबैको सपना हुन्छ। मेरो हातमा प्रदर्शन गर्नु र खेलमा केन्द्रीत हुनु मात्र छ। जहिले पनि 'गड्स प्लान (भगवानको योजना)' लेखेर पोस्ट गर्छु, बाँकी कुरा भगवानमा छोडेको छु,’ उनको भनाइ छ।
यता मध्यम गतिका बलर नन्दन यादवसहित मध्यक्रमका ब्याटर आरिफ शेख र आक्रामक ब्याटर लोकेश बमले पनि पहिलो पटक विश्वकप खेल्न लागेका हुन्। बाँकी ७ जना जना खेलाडीले दोस्रो पटक विश्वकप खेल्दैछन्। अघिल्लो संस्करण खेलेका कुशल भुर्तेल, आरिफ शेख, कप्तान रोहित पौडेल, दीपेन्द्रसिंह ऐरी, सन्दीप लामिछाने, गुल्सन झा र करण केसीले आज खेल खेल्दैछन्।
सोमपाल कामी आजको टोलीमा छैनन्। उनले तेस्रो संस्करणको विश्वकप खेल्ने भने अर्को खेल कुर्ने भएको छ।
नेपाली टोली
कुशल भुर्तेल
आसिफ शेख
रोहित पौडेल
दीपेन्द्र सिंह ऐरी
आरिफ शेख
लोकेश बम
गुल्सन झा
करण केसी
शेर मल्ल
नन्दन यादव
सन्दीप लामिछाने
टिम इंग्ल्यान्ड
फिल साल्ट
जोस बटलर
जेकब बेथेल
टम ब्यान्टन
ह्यारी ब्रुक
स्याम कुरान
विल ज्याक्स
लियाम डसन
जोफ्रा आर्चर
आदिल रशीद
लुक वुड
टी-२० अन्तर्राष्ट्रिय क्रिकेटमा यी दुई टोली पहिलो पटक एक-अर्काविरुद्ध मैदानमा उत्रिन लागेका हुन्। प्रतियोगिताको 'सुपर ८' चरणमा पुग्न दुवै टोलीका लागि यो खेल जित्दै सुखद सुरुवात गर्नु निकै महत्त्वपूर्ण छ।
सन् २०२२ को टी-२० विश्वकप जितेयता इंग्ल्याण्डको यात्रा सहज रहेन।
२०२३ को एकदिवसीय विश्वकप र २०२५ को च्याम्पियन्स ट्रफीमा खराब प्रदर्शनका साथै 'एसेज' सिरिजमा पनि उसले हार बेहोरेको थियो। तर, पछिल्लो एक वर्षमा इंग्ल्याण्डले उत्कृष्ट पुनरागमन गरेको छ। उसले खेलेका पछिल्ला ११ खेलमध्ये १० खेलमा जित हात पारेको छ। उसले श्रीलंकाविरुद्धको ३-० को क्लिन स्विप गरेको थियो।
इंग्ल्याण्डको मुख्य शक्ति उसको ब्याटिङ हो। जोस बटलर, टम बान्टन, ह्यारी ब्रुक र साम कुरान जस्ता खेलाडीहरूले जुनसुकै बेला खेलको नतिजा बदल्न सक्छन्। बलिङतर्फ स्पिनमैत्री पिचलाई ध्यानमा राख्दै इंग्ल्याण्डले आदिल राशिद, रेहान अहमद र लियाम डसन जस्ता स्पिनरहरूलाई टोलीमा राखेको छ। तीव्र बलिङमा जोफ्रा आर्चरले नेतृत्व गर्नेछन्।
नेपाल 'जायन्ट-किलर' बन्ने दाउमा
सन् २०२४ को विश्वकपमा छनोट भएपछि नेपाली क्रिकेटको स्तरमा ठूलो सुधार आएको छ।
पछिल्लो समय नेपालले खेलेका २३ खेलमध्ये १७ मा जित निकाल्दै आफ्नो आत्मबल बढाएको छ। गत असोजमा शारजाहमा वेस्ट इन्डिजविरुद्ध २-१ को ऐतिहासिक सिरिज जित्नु नेपालका लागि कोशेढुङ्गा सावित भयो। नेपाल अब ठूला टोलीहरूलाई चुनौती दिन सक्ने सक्षम टोली बनेको छ।
नेपालको ब्याटिङ कुशल भुर्तेल र आसिफ शेखमाथि धेरै निर्भर छ। कुशल भुर्तेल र उप-कप्तान दीपेन्द्र सिंह ऐरी दुवैसँग टी-२० मा शतक प्रहार गरेको अनुभव छ। बलिङतर्फ सन्दीप लामिछाने नेपालका मुख्य स्पिनर हुन्, जो विश्वका कुनै पनि ब्याटिङ लाइनअपका लागि खतरा बन्न सक्छन्।
दुवै टोलीले आफ्ना पछिल्ला ५ खेलमा लगातार जित हात पारेका छन्।
वानखेडेमा इंग्ल्याण्डले यो मैदानमा खेलेका ४ खेलमध्ये २ मा जित र २ मा हार बेहोरेको छ।
वानखेडे स्टेडियमको पिच ब्याटिङका लागि राम्रो मानिने हुनाले यो खेल उच्च स्कोरको हुने अपेक्षा गरिएको छ। यद्यपि इंग्ल्याण्डका ब्याटरहरू कहिलेकाहीँ स्पिन बलिङमा फस्ने गरेकाले नेपालका स्पिनरहरूले यो खेलमा महत्त्वपूर्ण भूमिका खेल्न सक्छन्।
-1746009348.jpg)
