आइसिसी टी-२० विश्वकप २०२६ मा नेपालले समूहको पहिलो खेलमा इंग्ल्यान्डविरूद्ध जित नजिक पुगेर पनि खेल गुमायो।
अन्तिम ओभरमा १० रन चाहिएको नेपाल जित नजिक पुगिसकेको थियो। १९ औं ओभरमा दुई चौका प्रहार गरेका लोकेश बम ब्याटिङमा थिए।
लोकेशले त्यतिबेलासम्म १५ बलमा चार चौका र दुई छक्काको मद्धतमा ३५ रन बनाइसकेका थिए।
अन्तिम ओभरमा इंग्ल्यान्डका लागि बलिङमा आएका थिए देब्रे हाते मध्यम गतिका बलर साम करण। ६ बलमा १० रन बनाउनु पर्ने अवस्थामा लोकेशले पहिलो दुई बलमा एक रन मात्र लिन सके। तेस्रो बलमा करण केसीले एक रन दिएपछि चौथो बलमा लोकेशले दुई रन दौडिएर लिए। पाँचौं बलमा लोकेशले एक रनका लागि कल गरे पनि करणले रन लिन अस्वीकार गरेका थिए। अन्तिम बल पनि एक रन मात्र लिएपछि नेपाल जित नजिक पुगेर पनि ४ रनले पराजित भयो।
१८५ रनको लक्ष्य पछ्याएको नेपालले ६ विकेटको क्षतिमा १८० रन मात्र बनाउन सक्यो। अन्तिम ओभरमा नेपालले कुनै बाउन्ड्री प्रहार गर्न नसक्नु नै घातक सावित भयो। सामले एकदमै राम्रो लेन्थमा बल फ्याँकेका थिए। कुनै पनि उनले नराम्रो फ्याँकेनन्।
बिबिसीसँग कुरा गर्दै साम पनि आफूसँगै राम्रो बलिङ बाहेकको कुनै विकल्प नभएको र त्यो विषयमा कप्तान ह्यारी ब्रुकसँग सल्लाह गरेको बताएका थिए।
अन्तिम ओभरमा ब्याटिङ रहेका लोकेश बमले पनि आफ्नो मनस्थितिको विषयमा कुराकानी गरेका छन्। लोकेशले आफूले अन्तिम ओभरमा विपक्षी बलरले ‘नराम्रो’ बल गरेमा हान्ने तयारी गरिरहेको बताए।
‘म सर्ट प्रहार गर्ने प्रयास गरिरहेको थिएँ। यदि उसले (साम) मिस गरेको अवस्थामा म त्यस बललाई प्रहार गर्न तयार थिएँ। अन्तिम बलमा मेरो दिमागमा यही कुरा थियो,’ लोकेशले भने, ‘म एउटा ठूलो शट खोजिरहेको थिएँ। यदि एउटा ठूलो शट आयो भने परिस्थिति फरक हुन्थ्यो। मलाई थाहा थियो उसले योर्कर फाल्नेछन्।’
तर सामले कुनै पनि बल नराम्रो फालेनन्। राम्रो लेन्थमा बलिङ गर्दा लोकेशले कुनै पनि बलमा ब्याट घुमाउन सकेनन्।
‘मलाई लाग्यो कुनै बेला सामले योर्कर मिस गर्न सक्छन् र त्यसपछि त्यो अवसर लिँदै हान्नेछु,’ लोकेशले भने, ‘स्थिति एकदम स्पष्ट थियो। म हरेक बल हान्ने अवसर खोजिरहेको थिएँ।’
यो पनि : तीन देशको पूर्वकप्तानका टोलीविरूद्ध अर्धशतक हानेर चर्चामा आएका विस्फोटक लोकेश
मुम्बईको वानखेडे रंगशालामा भएको खेलमा नेपालको खेल हेर्न हजारौं समर्थक उपस्थित भएका थिए।
नेपाली फ्यान स्वदेशबाट मात्र होइन मलेसिया, सिंगापुर, युएई, युरोप, अमेरिका,अस्ट्रेलियाबाट आएका थिए। २० हजारभन्दा बढी समर्थकका बीच मुम्बईको वानखाडे रंगशाला नेपाली समर्थकले गुञ्जायमान थियो। तर अन्तिम बलमा नेपाल टिम चुकेपछि समर्थक स्तब्ध बनेका थिए।
‘हामी धेरै कृतज्ञ छौं। जति पटक पनि हामी जाँदा फ्यानहरू सपोर्ट गर्न आउँछन्, हामी यसको लागि धेरै आभारी छौं,’ लोकेशले समर्थकलाई धन्यवाद दिए।
नेपालले दुई पटकको विश्वकप विजेता इंग्ल्यान्डविरूद्ध उत्कृष्ट खेल देखाएको भन्दै क्रिकेट वृत्तमा प्रशंसा भइरहेको छ। तर कतिपयले भने नेपालले अनुभव र तयारीका कारणले अन्तिम ओभरमा खेल हारेको भन्दै आलोचना गरेका छन्। दुई वर्षअघिको विश्वकपमा पनि नेपालले दक्षिण अफ्रिकासँग एक रनको हार ब्यहोरेको थियो। बंगलादेशलाई पनि कडा टक्कर थियो।
यसपटक पनि इंग्ल्यान्डविरूद्ध नेपाल पराजित हुनु अनुभव र रणनीतिको कमी भएको देखिन्छ। हुन त नेपालले पछिल्लो चार महिना कुनै पनि देशसँग सिरिज खेलेको थिएन। एक महिना लामो नेपाल प्रिमियर लिगपछि नेपाली टोलीले विश्वकपको अन्तिम तयारी भारत र श्रीलंकाका स्थानीय टोलीसँग अभ्यास खेल खेलेको थियो।
नेपालले आइसिसी टी-२० विश्वकप २०२६ पहिलो खेलमा दुई पटकको विश्वविजेता इंग्ल्यान्डलसँग प्रतिस्पर्धात्मक खेल खेल्नु भने राम्रो संकेत हो।
अब नेपालले समूह ‘सी’ मा बिहीबार इटालीसँग, आइतबार वेस्ट इन्डिज र अन्तिम खेल फागुन ५ मा स्कटल्यान्डसँग खेल्नेछ। यी सबै खेल मुम्बईकै वानखेडे रंगशालामा हुनेछ। शीर्ष दुईमा पर्ने टोली सुपर-८ मा पुग्नेछन्।
-1746009348.jpg)
