पाकिस्तानले वेस्ट इन्डिजलाई उसकै मैदान त्रिनिदादमा ८ विकेटले पराजित गर्दै तीन वर्षपछि विदेशी भूमिमा पहिलो टेस्ट जित हात पारेको छ। यो जितसँगै दुई खेलको टेस्ट सिरिज १-१ को बराबरीमा सकिएको छ।
जितका लागि ७५ रनको सामान्य लक्ष्य पछ्याएको पाकिस्तानले खेलको चौथो दिन २४ ओभरभित्रै मात्र २ विकेट गुमाएर लक्ष्य पूरा गर्यो। पाकिस्तानका लागि ओपनर अब्दुल्लाह शफिक र कप्तान बाबर आजमले समान २४-२४ रन बनाउँदै टोलीलाई जितसम्म पुर्याए। दुवै ब्याटर अविजित रहे।
वेस्ट इन्डिजले आफ्नो दोस्रो इनिङ्समा निकै खराब प्रदर्शन गर्यो। तेस्रो दिनको खेल सकिँदा १०३ रनमा ६ विकेट गुमाएको वेस्ट इन्डिज चौथो दिन खेल सुरु भएको आधा घण्टाभित्रै ११७ रनमा अलआउट भयो। टोलीका मुख्य ब्याटर ब्रान्डन किंग चोटका कारण ब्याटिङ गर्न आउन सकेनन्।
वेस्ट इन्डिजलाई सस्तैमा समेट्न पाकिस्तानका स्पिनरहरू अली उस्मान र साजिद खानले ४-४ विकेट लिए। आफ्नो दोस्रो टेस्ट खेलिरहेका अली उस्मानले चौथो दिन थप दुई विकेट लिए।
यो जित पाकिस्तानका लागि निकै महत्त्वपूर्ण छ। सन् २०२३ जुलाईमा श्रीलङ्कालाई हराएयता पाकिस्तानले आफ्नो देशबाहिर खेलेका लगातार ८ वटा टेस्ट खेलमा हार बेहोरेको थियो। यो जितले पाकिस्तानको त्यो खराब यात्रालाई पूर्णविराम लगाएको छ।
सिरिजको पहिलो खेल वेस्ट इन्डिजले जितेको थियो भने यो खेल जितेर पाकिस्तानले सिरिज बराबरी गर्न सफल भएको छ। अब पाकिस्तानी टोली तीन खेलको टेस्ट सिरिज खेल्न इंग्ल्याण्ड जानेछ, जुन अगस्ट १९ (बुधबार) बाट सुरु हुनेछ।
