अन्तर्राष्ट्रिय क्रिकेट परिषद् (आइसिसी) ले सन् २०३५ सम्म आयोजना हुने प्रमुख पुरुष अन्तर्राष्ट्रिय प्रतियोगिताको समयतालिका सार्वजनिक गरेको छ।
इन्डोनेसियाको बालीमा आइतबार बसेको आइसिसी बोर्ड बैठकले विभिन्न प्रतियोगिताको मिति, आयोजना स्थल तथा विश्वकप छनोटको प्रक्रिया स्वीकृत गरेको हो।
आइसिसीले सन् २०२८ को टी–२० विश्वकपदेखि २०३५ को एकदिवसीय विश्वकपसम्मका प्रमुख प्रतियोगिताको समयावधि तय गरेको छ। यससँगै सन् २०२७ को एकदिवसीय विश्वकप, २०२८ को पुरुष टी–२० विश्वकप र महिला टी–२० विश्वकपको छनोट प्रक्रिया पनि सार्वजनिक गरिएको छ।
आइसिसीका प्रमुख कार्यकारी अधिकृत सञ्जोग गुप्ताले प्रतियोगिताको समयतालिका र छनोट प्रक्रियाले विश्व क्रिकेटको संरचनालाई बलियो बनाउने बताएका छन्। यसले पूर्ण सदस्य र एसोसिएट राष्ट्रलाई अन्तर्राष्ट्रिय क्रिकेटमा अवसर बढाउनुका साथै खेलाडीको विकास र प्रतिस्पर्धात्मक स्तर सुधार गर्न सहयोग पुग्ने उनको भनाइ छ।
२०३५ सम्मका प्रमुख प्रतियोगिताको तालिका
आइसिसीले सन् २०२८ देखि २०३५ सम्म आयोजना हुने प्रमुख पुरुष प्रतियोगिताको समयतालिका सार्वजनिक गरेको छ। यस अवधिमा टी–२० विश्वकप, एकदिवसीय विश्वकप, च्याम्पियन्स ट्रफी र विश्व टेस्ट च्याम्पियनसिपको फाइनल आयोजना हुनेछन्।
२०२८ पुरुष टी–२० विश्वकप अस्ट्रेलिया र न्युजिल्यान्ड अक्टोबर १२–नोभेम्बर १२
२०२९ विश्व टेस्ट च्याम्पियनसिप फाइनल इंग्ल्यान्ड जुन ८–१२
२०२९ च्याम्पियन्स ट्रफी भारत अक्टोबर ९–२८
२०३० पुरुष टी–२० विश्वकप इंग्ल्यान्ड, आयरल्यान्ड र स्कटल्यान्ड जुलाई ४–अगस्ट ४
२०३१ विश्व टेस्ट च्याम्पियनसिप फाइनल इंग्ल्यान्ड जुन १२–१६
२०३१ एकदिवसीय विश्वकप भारत र बंगलादेश अक्टोबर ९–नोभेम्बर २३
२०३२ पुरुष टी–२० विश्वकप आयोजक तय हुन बाँकी अक्टोबर १४–नोभेम्बर १४
२०३३ विश्व टेस्ट च्याम्पियनसिप फाइनल आयोजक तय हुन बाँकी जुन ९–१३
२०३३ च्याम्पियन्स ट्रफी आयोजक तय हुन बाँकी अक्टोबर २–२३
२०३४ पुरुष टी–२० विश्वकप आयोजक तय हुन बाँकी जुलाई ६–अगस्ट ६
२०३५ विश्व टेस्ट च्याम्पियनसिप फाइनल आयोजक तय हुन बाँकी जुन ७–११
२०३५ एकदिवसीय विश्वकप आयोजक तय हुन बाँकी अक्टोबर २–नोभेम्बर १८
एकदिवसीय विश्वकप छनोटमा १० टोली, २३ खेल
आइसिसीले सन् २०२७ मा आयोजना हुने एकदिवसीय विश्वकपको छनोट प्रतियोगिताको स्वरूप पनि सार्वजनिक गरेको छ। सन् २०२७ को फेब्रुअरीदेखि मार्चसम्म हुने छनोट प्रतियोगितामा १० टोली सहभागी हुनेछन्। प्रतियोगितामा कुल २३ खेल खेलाइनेछ।
१० टोलीलाई पाँच–पाँच टोलीको दुई समूहमा विभाजन गरिनेछ। समूह चरणपछि दुवै समूहका शीर्ष दुई टोलीले सेमिफाइनल खेल्नेछन्। त्यसपछि फाइनल हुनेछ।
छनोट प्रतियोगिताबाट शीर्ष चार टोलीले सन् २०२७ को एकदिवसीय विश्वकपमा स्थान बनाउनेछन्। प्रतियोगिताको विजेताले विश्वकपको समूह चरणमा सिधै स्थान पाउनेछ। बाँकी तीन टोलीले भने सुपर सिरिज खेल्नेछन्। उक्त सिरिजबाट अन्तिम समूह चरणको स्थान निर्धारण हुनेछ।
२०२८ को पुरुष टी–२० विश्वकप छनोटमा १६ टोली
सन् २०२८ मा अस्ट्रेलिया र न्युजिल्यान्डमा आयोजना हुने पुरुष टी–२० विश्वकपको ग्लोबल छनोटमा १६ टोली सहभागी हुनेछन्। सन् २०२८ को पहिलो त्रैमासिकमा आयोजना हुने छनोट प्रतियोगितामा कुल ३१ खेल हुनेछन्।
१६ टोलीलाई चार समूहमा विभाजन गरिनेछ। समूह चरणपछि क्वार्टरफाइनल, सेमिफाइनल र फाइनलका खेल हुनेछन्। ग्लोबल छनोटबाट आठ टोलीले टी–२० विश्वकपमा स्थान बनाउनेछन्।
छनोटमा क्षेत्रीय प्रतिनिधित्वलाई पनि प्राथमिकता दिइनेछ। प्रत्येक क्षेत्रको उत्कृष्ट टोलीले न्यूनतम प्रदर्शन मापदण्ड पूरा गरेको अवस्थामा विश्वकपमा स्थान पाउनेछ। बाँकी स्थान समग्र प्रतियोगितामा उत्कृष्ट प्रदर्शन गर्ने टोलीलाई दिइनेछ।
सेमिफाइनल पुग्ने चारवटै टोली छनोट हुनेछन्। क्वार्टरफाइनलमा पराजित हुने चार टोलीलाई समूह चरणको स्थान, अंक, जित संख्या र नेट रनरेटका आधारमा पाँचौँदेखि आठौँ स्थानसम्मको वरीयता दिइनेछ।
त्यसैगरी, समूहमा तेस्रो हुने टोलीलाई नवौँदेखि १२औँ तथा चौथो हुने टोलीलाई १३औँदेखि १६औँ स्थानमा राखिनेछ। चौथो हुने टोली विश्वकप छनोटका लागि अयोग्य हुनेछ।
क्षेत्रीय प्रतिनिधित्व नपुगेको अवस्थामा सम्बन्धित क्षेत्रको उत्कृष्ट टोलीलाई प्राथमिकता दिइनेछ। त्यसका लागि आवश्यकताअनुसार पाँचौँदेखि आठौँ स्थानसम्म रहेका टोलीमध्ये आफ्नो क्षेत्रको उत्कृष्ट टोली नभएको सबैभन्दा तल्लो वरीयताको टोलीलाई हटाएर अर्को क्षेत्रको उत्कृष्ट टोलीलाई छनोट गरिनेछ।
महिला टी–२० विश्वकप छनोटमा आठ टोलीले पाउने अवसर
सन् २०२८ को महिला टी–२० विश्वकपको ग्लोबल छनोटमा १० टोली सहभागी हुनेछन्। सन् २०२६ को प्रतियोगितामा सहभागी भए पनि सन् २०२८ का लागि स्वतः छनोट हुन नसकेका नेदरल्यान्ड्स र स्कटल्यान्डले ग्लोबल छनोटमा स्थान बनाइसकेका छन्।
उनीहरूसँगै क्षेत्रीय छनोटबाट आठ टोली ग्लोबल छनोटमा पुग्नेछन्। सन् २०२७ मा हुने पाँच क्षेत्रीय छनोट प्रतियोगिताबाट ती टोली छानिनेछन्।
अफ्रिका, एसिया र इस्ट एसिया प्यासिफिक क्षेत्रबाट दुई–दुई टोली छनोट हुनेछन्। अमेरिकाज र युरोपबाट एक–एक टोलीले स्थान बनाउनेछन्।
ग्लोबल छनोटमा शीर्ष दुई स्थान हासिल गर्ने टोलीले सन् २०२८ को महिला टी–२० विश्वकपमा स्थान पक्का गर्नेछन्।
लस एन्जलस ओलम्पिकको छनोट अमेरिका र बंगलादेशमा
सन् २०२८ मा अमेरिकाको लस एन्जलसमा आयोजना हुने ओलम्पिक खेलकुदमा क्रिकेटलाई पुनः समावेश गरिएको छ। त्यसका लागि हुने अन्तिम छनोट प्रतियोगिताको आयोजक र मिति पनि आइसिसीले सार्वजनिक गरेको छ।
पुरुषतर्फको ओलम्पिक छनोट प्रतियोगिता सन् २०२८ को फेब्रुअरी ५ देखि १३ सम्म बंगलादेशमा हुनेछ। महिला टोलीको छनोट भने फेब्रुअरी २६ देखि मार्च ५ सम्म अमेरिकामा आयोजना हुनेछ।
दुवै छनोट प्रतियोगितामा आठ–आठ टोली सहभागी हुनेछन्। टोलीलाई चार–चार सदस्यीय दुई समूहमा विभाजन गरिनेछ। समूहका प्रत्येक टोलीले एकअर्कासँग एकपटक खेल्नेछन्। दुवै समूहका विजेताले फाइनल खेल्नेछन्।
फाइनल जित्ने टोलीले लस एन्जलस ओलम्पिकमा स्थान बनाउनेछ। यसरी पुरुष र महिला दुवैतर्फ अन्तिम एक–एक स्थानको टुंगो लाग्नेछ।