अगस्ट १५ देखि सुरु हुने श्रीलंकाविरुद्धको महत्त्वपूर्ण टेस्ट सिरिज सुरु हुनुअघि भारतीय क्रिकेट टोलीलाई ठूलो झट्का लागेको छ।
भारतीय टेस्ट टोलीका कप्तान शुभमन गिल अभ्यासका क्रममा घाइते भएका छन्। चोटका कारण उनी श्रीलंका क्रिकेट ११ विरुद्धको तीन दिने अभ्यास खेलको पहिलो दिन मैदानमा उत्रन सकेनन्।
भारतीय क्रिकेट नियन्त्रण बोर्डका अनुसार बिहीबार अभ्यास गर्ने क्रममा गिलको दाहिने हातको औंलामा चोट लागेको थियो। नेटमा तीव्र गतिका बलर गुर्नुर ब्रारको बल खेल्ने क्रममा उनलाई चोट लागेको हो।
त्यसको केही समयपछि स्लिपमा फिल्डिङ अभ्यास गर्दा पनि सोही ठाउँमा उनलाई दोस्रो पटक बलले लागेको थियो। सावधानी अपनाउन उनलाई अहिले आराम दिइएको छ र मेडिकल टिमले उनको स्वास्थ्य अवस्थाको निगरानी गरिरहेको छ।
गिलको अनुपस्थितिमा अभ्यास खेलमा केएल राहुलले भारतीय टोलीको कप्तानी गरिरहेका छन्। श्रीलंकाविरुद्धको मुख्य टेस्ट सिरिज सुरु हुन अझै एक साता बाँकी रहेकाले, कप्तान गिल समयमै निको हुनेमा टोली व्यवस्थापन आशावादी छ।
अहिले भारतीय टोलीका धेरै खेलाडीहरू चोटसँग जुधिरहेका छन्। तीव्र गतिका बलर जसप्रित बुमराह घुँडाको चोटका कारण पहिले नै टोली बाहिर छन्। त्यस्तै, वासिङ्टन सुन्दर र साई सुदर्शन पनि चोटका कारण टोलीमा उपलब्ध छैनन्।
भारतका लागि श्रीलंकाविरुद्धको यो टेस्ट सिरिज निकै महत्त्वपूर्ण छ। विश्व टेस्ट च्याम्पियनसिपको फाइनलमा पुग्न भारतले बाँकी रहेका ९ खेलमध्ये कम्तीमा ७ खेल जित्नुपर्ने दबाब छ। यस्तो अवस्थामा मुख्य खेलाडी र कप्तान नै घाइते हुनु भारतका लागि चिन्ताको विषय बनेको छ।
