न्युजिल्यान्डको ‘ए’ क्रिकेट टोली र नेपाली राष्ट्रिय क्रिकेट टोलीबीच अस्ट्रेलियामा प्रतिस्पर्धा हुँदैछ।
त्यसअघि न्युजिल्यान्ड ‘ए’ ले अगस्ट २० देखि ३० सम्म डार्विनमा हुने ‘टप एन्ड टी-२० सिरिज’ खेल्नेछ। यो सिरिजमा नेपालले पनि प्रतिस्पर्धा गर्दैछ।
न्युजिल्यान्डको टोलीका १६ मध्ये १३ जना खेलाडीहरूसँग न्युजिल्यान्डको राष्ट्रिय टोलीबाट खेलिसकेको अनुभव छ ।
टी-२० प्रतियोगिता सकिए लगत्तै ५० ओभरको खेलहरू हुनेछन्।
न्युजिल्यान्ड ‘ए’ ले तीनवटा छुट्टाछुट्टै खेल खेल्ने तालिका छ, जसमा उसले नेपाल, दक्षिण अस्ट्रेलिया र तस्मानीयाको सामना गर्नेछ।
नेपालका लागि न्युजिल्यान्डको यो अनुभवी टोलीसँगको खेल निकै महत्त्वपूर्ण र चुनौतीपूर्ण हुने अपेक्षा गरिएको छ।
टोलीमा वेस्ट इन्डिज विरुद्धको एकदिवसीय सिरिजमा उत्कृष्ट प्रदर्शन गरेका स्पिनर जेडेन लेनोक्स, लेग स्पिनर आदि अशोक र विष्फोटक ब्याटर टिम रोबिन्सन जस्ता खेलाडीहरू छन् । रोबिन्सनले यसअघि अस्ट्रेलिया विरुद्धको अन्तर्राष्ट्रिय टी-२० खेलमा शतक प्रहार गरिसकेका छन् ।
यस्तै तीव्र गतिको बलिङतर्फ क्रिस्टियन क्लार्क, म्याट फिसर र बेन लिस्टर जस्ता अनुभवी खेलाडीहरू रहेका छन्। सन् २०२५ मा डेब्यु गरेका युवा ब्याटर रिस मार्यु पनि ५० ओभरको टोलीमा समावेश छन्।
