नेपाल क्रिकेट संघ (क्यान)ले नेपाली क्रिकेट टिमका पूर्वकप्तान रोहित पौडेललाई धन्यवाद दिएको छ।
मंगलबार बिहान सामाजिक सञ्जालमा एक पोष्ट हालेर धन्यवाद दिएको हो।
क्यानले सोमबार एकदिवसीय राष्ट्रिय क्रिकेट टोलीको कप्तानको रूपमा सन्दिप लामिछानेलाई नियुक्त गरेको छ।
क्यानले पौडेललाई बिदाइ गर्दै एक पटक नेता भइसकेको व्यक्ति सँधैका लागि नेता बनेको उल्लेख गरेको छ।
‘पुरूष राष्ट्रिय टोलीको कप्तानको रूपमा तपाईंको नेतृत्वमा, हामीले उल्लेखनीय माइलस्टोनहरू हासिल गर्यौं र यस्ता क्षणहरू सिर्जना गर्यौं जुन नेपाल क्रिकेटको यात्राको एउटा गर्विलो हिस्सा बनेर रहनेछन्,’ क्यानले लेखेको छ, ‘टोली, देश र खेलप्रतिको तपाईंको प्रतिबद्धता सधैं प्रेरणाको स्रोत बनेको छ। हामीलाई विश्वास छ कि तपाईंले आफ्नो सम्पूर्ण यात्रामा देखाउनुभएको उही भावना, गर्व र समर्पणका साथ नेपालको सेवा गरिरहनुहुनेछ। एक पटकको नेता, सधैंको नेता।’
२०७९ को कात्तिकमा रोहित नेपालको कप्तान बनेका थिए। त्यतिबेला पनि रोहितले सन्दीपकै स्थान लिएका थिए।
बलात्कार मुद्दामा सन्दीप लामिछाने निलम्बनमा परेपछि रोहितले कप्तानको जिम्मेवारी पाएका थिए। यो मद्दामा अहिले सन्दीपले सफाइ पाएका छन्।
नेपालको टी-२० कप्तान भने दीपेन्द्रसिंह ऐरी छन्।
सन्दीपले चार वर्षपछि कप्तानमा पुनरागमन गर्दा मलेसियामा हुने एसिसी प्रिमियर कपमा नेपाली टोलीको नेतृत्व गर्नेछन्। प्रिमियर कप एकदिवसीय फर्म्याटमा हुनेछ। यो एसिया कप छनोट समेत हो।
प्रिमियर कपका लागि क्यानले राष्ट्रिय टोली समेत घोषणा गरेको छ। टोलीमा कुशल भुर्तेल र सोमपाल कामी भने छैनन्। एकदिवसीय टोलीमा देव खनाल र बसिर अहमदको पुनरागमन भएको छ। यस्तै आरिफ शेख पनि हटाइएका छन्। भीम सार्की पनि टोलीमा छैनन् भने शेर मल्ल एकदिवसीय टोलीमा अटाएका छन्।
नेपाली टोली
१ सन्दीप लामिछाने (कप्तान)
२ आसिफ सेख
३ अर्जुन कुमाल
४ रोहित पौडेल
५ देव खनाल
६ दीपेन्द्र सिंह ऐरि
७ बसिर अहमद
८ ईशान पाण्डे
९ गुलशन झा
१० सेर मल्ल
११ ललित राजवंशी
१२ करण के सी
१३ हेमन्त धामी
१४ सन्दीप जोरा
