अन्तर्राष्ट्रिय क्रिकेट परिषद् (आइसिसी) ले सन् २०२७ को एकदिवसीय विश्वकपको ढाँचामा अन्तिम समयमा गरेको परिवर्तनप्रति स्कटल्याण्ड र नेदरल्याण्ड्सले कडा आपत्ति जनाएका छन्।
दुवै देशका क्रिकेट बोर्डले एक संयुक्त विज्ञप्ति जारी गर्दै आइसिसीको यो कदमलाई ‘निराशाजनक र अपमानजनक’ भनेका छन्।
आइसिसीले हालै एउटा नयाँ नियम ल्याएको छ, जसअनुसार छनोट भएर आउने पुछारका तीन टोली (१२औं, १३औं र १४औं स्थानका) बीच फेरि एउटा 'सुपर सिरिज' (त्रिकोणात्मक श्रृंखला) खेलाइनेछ। ती तीनमध्ये एउटा टोली मात्र विश्वकपको मुख्य समूह चरणमा प्रवेश गर्न पाउनेछ।
विश्वकप सुरु हुन १८ महिनाभन्दा कम समय बाँकी रहँदा र छनोट प्रक्रिया बीचैमा पुग्दा नियम परिवर्तन गरिनुलाई एसोसिएट राष्ट्रहरूले अन्यायपूर्ण मानेका छन्।
यो विषयमा छलफल गर्न एसोसिएट राष्ट्रहरूले आइसिसीसँग दुई पटक बैठक गरे पनि आइसिसीले पछिल्लो दुई हप्तादेखि कुनै लिखित जवाफ नदिएको उनीहरुको गुनासो छ।
यो निर्णयले उदाउँदा राष्ट्रहरूको मनोबल गिराउने र क्रिकेटलाई विश्वव्यापी बनाउने अभियानमा धक्का पुग्ने उनीहरूको दाबी छ।
सीमित स्रोत-साधन भएका बोर्डहरूले वर्षौंदेखि विश्वकपको तयारी गरिरहेका हुन्छन्। बीचैमा नियम फेरिँदा उनीहरूको लगानी र योजना अन्योलमा परेको दुवै बोर्डको भनाइ छ।
मैदानमा मेहनत गरेर सफलता प्राप्त गर्नुपर्छ भन्ने सिद्धान्तविपरीत नियमहरू बनाइएको"भन्दै उनीहरूले आइसिसीको पारदर्शितामाथि प्रश्न उठाएका छन्।
स्कटल्याण्ड, नेदरल्याण्ड्स र नामिबियाका कप्तानहरूले पनि यो नयाँ ढाँचाप्रति असन्तुष्टि जनाएका छन्। उनीहरूका अनुसार एसोसिएट राष्ट्रहरूले ठूला टोलीलाई हराएर विश्वकपमा रोमाञ्चकता थप्ने गरेका छन्, तर नयाँ नियमले साना टोलीका लागि अवसरहरू साँघुरो बनाएको छ।
