भ्रष्टाचार र विवादका कारण पटक-पटक संकटमा पर्दै आएको 'अबु धाबी टी-१०' क्रिकेट लिग अब नयाँ स्वरूपमा देखिने भएको छ।
लिगलाई मर्यादित र स्थिर बनाउन अबु धाबी सरकारले यसको मुख्य स्वामित्व आफ्नो हातमा लिएको छ। दशौँ सिजनमा प्रवेश गर्न लागेको यो लिगले नयाँ टिम मालिकहरूसँग मिलेर प्रतियोगितालाई विश्वस्तरीय बनाउने लक्ष्य राखेको छ।
सन् २०१७ मा व्यवसायी साजी उल मुल्कले सुरु गरेको यो विश्वकै पहिलो १० ओभरको क्रिकेट फर्म्याट हो। तर, सुरुदेखि नै यो लिग 'फिक्सिङ' र भ्रष्टाचारका कारण विवादमा रह्यो। सन् २०२३ मा एउटा टिमका ८ जना व्यक्तिलाई भ्रष्टाचारको आरोप लाग्यो भने हालै मात्र अमेरिकी खेलाडी अखिलेश रेड्डीलाई ८ वर्षको प्रतिबन्ध लगाइएको छ।
यसबाहेक खेलाडीहरूलाई समयमा पारिश्रमिक नदिने र टिम मालिकहरू छिटो-छिटो फेरिने समस्याले गर्दा लिगको छवि धमिलिएको थियो।
यही बिग्रँदो छविलाई बचाउन अबु धाबी सरकारले 'अबु धाबी क्रिकेट एण्ड स्पोर्ट्स हब' मार्फत लिगको जिम्मेवारी लिएको क्रिकइन्फोको समाचारमा उल्लेख छ।
अबु धाबी स्पोर्ट्स काउन्सिलका सिइओ म्याट बाउचरका अनुसार, केही टिम मालिकहरूको गलत निर्णयले गर्दा अबु धाबी शहरकै बदनाम हुन थालेपछि सरकारले हस्तक्षेप गर्नुपरेको हो।
अहिले 'डेलोइट' कम्पनीमार्फत नयाँ टिम मालिकहरू खोज्ने काम भइरहेको छ। बाउचरका अनुसार भारतीय प्रिमियर लिगका केही टिम मालिकहरूले पनि यसमा चासो देखाएका छन्। यदि आइपिएलका मालिकहरू यो लिगमा जोडिएमा यसको विश्वासनीयता अझै बढ्ने आयोजकको विश्वास छ।
अबु धाबी सरकारले अब २-३ वर्षमै टिम फेरिरहने मालिकहरूभन्दा पनि दीर्घकालीन रूपमा साथ दिने लगानीकर्ताहरूलाई प्राथमिकता दिने बताएको छ। अबु धाबीले आफ्नो हिउँदे खेलकुद क्यालेन्डरमा 'फर्मूला वान' रेस र गल्फ जस्तै क्रिकेटलाई पनि एक प्रमुख उत्सवको रूपमा स्थापित गर्न चाहेको छ।
तत्कालका लागि टिमको सङ्ख्या बढाउने वा अन्य देशहरूसँग सहकार्य गर्ने कुनै योजना छैन। आगामी तीन वर्षसम्म लिगको व्यवस्थापन सुधार्ने र पारदर्शिता कायम गर्ने कुरामै मुख्य ध्यान दिइने बाउचरले स्पष्ट पारेका छन्।
