एसिसी प्रिमियर कपको तयारीका लागि नेपाली राष्ट्रिय क्रिकेट टोली बुधबार भारतको बेंगलुरु जाँदैछ। बेगलुरुमा दश दिनको क्याम्प सञ्चालन गरेपछि नेपाली टोली प्रतियोगिताका लागि मलेसिया जाँदैछ।
नेपाल क्रिकेट संघ (क्यान) का अनुसार मलेसिया पनि नेपालले ५ दिन तयारी गर्नेछ। बेंगलुरुमा दुई वटा अभ्यास खेल खेल्ने क्यानको भनाइ छ।
प्रतियोगितामा नेपाल समूह ‘ए’ मा छ। नेपालले समूह चरणमा हङकङ, आयोजक मलेसिया, बहराइन र साउदी अरेबियासँग खेल्नेछ। अर्को समूहमा युएई, ओमान, कुवेत, कतार र सिंगापुर छन्।
नेपालले पहिलो खेल भदौ १५ गते बहराइनसँग खेल्नेछ। दोस्रो खेल भदौ १८ गते मलेसिया, तेस्रो खेल भदौ २१ गते साउदी अरेबिया र अन्तिम खेल भदौ २३ मा हङकङसँग खेल्नेछ।
समूहमा शीर्ष दुईमा परे नेपाल सेमिफाइनल पुग्नेछ। सेमिफाइनल भदौ २५ गते, तेस्रो स्थान र फाइनल खेल भदौ २७ गते हुनेछ। २०२७ को एसिया कपमा छनोट हुनका लागि नेपाल यो प्रतियोगिताको शीर्ष तीन टोलीभित्र पर्नुपर्नेछ।
अन्तिम तयारीका लागि भारत जानुअघि विदाइ समारोहमा नेपाली टोलीका मुख्य प्रशिक्षक स्टुअर्ट लले प्राविधिक पक्ष र आगामी चुनौतीहरूबारे धारण व्यक्त गरे।
नेदरल्यान्ड्स भ्रमणका क्रममा पहिचान गरिएका कमजोरीहरूमा भारतमा हुने क्याम्पमा सुधार गर्ने उनले बताए। मलेसियाको पिच 'लो एन्ड स्लो' हुने र त्यसले नेपाली स्पिनरहरूलाई फाइदा पुग्ने उनको अपेक्षा छ।
टोलीमा युवा र अनुभवी खेलाडीहरूको राम्रो सन्तुलन रहेको र कप्तानमा पुनरागममन गरेका सन्दीप लामिछानेसँगको समन्वयमा बलियो टोली मैदानमा उतार्ने उनले बताए।
नेदरल्यान्ड्समा टस र पिचको अवस्थाका कारण अपेक्षित नतिजा नआएको उल्लेख गर्दै उनले ५० ओभरको खेलमा 'म्याच इन्टेलिजेन्स' र धैर्यताको महत्त्वबारे बताए। उनले नयाँ कप्तानसँग काम गर्न उत्साहित रहेको पनि बताए।
सन्दीपले विगतका टुरहरू सोचेजस्तो नभए पनि त्यसबाट पाठ सिक्दै अगाडि बढ्ने बताए। रोहित पौडेलले छोडेको बिरासतलाई अगाडि बढाउँदै टिमको हितमा काम गर्ने उनले प्रतिबद्धता जनाए।
२०२३ को एसीसी प्रिमियर कपको सफलताले धेरैको जीवन परिवर्तन गरेको स्मरण गर्दै यसपटक पनि ट्रफी जितेर एसिया कपमा छनोट हुने र नेपाललाई बलियो एसोसिएट राष्ट्रको रूपमा स्थापित गर्ने लक्ष्य रहेको उनको भनाइ छ।
भारतमा हुने तयारी क्याम्पले मलेसियाका लागि राम्रो आधार तयारी गर्ने र सबैको साथ-समर्थनले टिमको मनोबल उच्च हुने सन्दीपको विश्वास छ।
क्यानका सचिव पारस खड्काले अस्ट्रेलिया जाने 'ए' टिम र आगामी एसीसी प्रिमियर कपको महत्त्वबारे चर्चा गरे। प्रिमियर कप एसिया कप छनोटका लागि महत्त्वपूर्ण भएको उनको भनाइ छ।
क्यान अब व्यवस्थापनबाट अगाडि बढेर विकासमा ध्यान दिनुपर्ने र खेलाडीहरूलाई प्रोत्साहन गर्न प्रतिबद्ध रहेको बताए।
कप्तानी परिवर्तनको विषयमा बोल्दै उनले यो 'समयको माग' भएको र २०२७/२८ को विश्वकपलाई लक्षित गरी दुई उत्कृष्ट खेलाडीलाई नेतृत्व सुम्पिएको खुलाए। उनले निवर्तमान कप्तान रोहित पौडेलको योगदानको प्रशंसा गर्दै आधुनिक क्रिकेटमा प्रतिस्पर्धात्मकताका लागि यो निर्णय लिइएको स्पष्ट पारे।
प्रिमियर कप खेल्ने नेपाली टोली
१. सन्दीप लामिछाने (कप्तान) २. रोहित पौडेल ३. आसिफ शेख ४. अर्जुन कुमाल ५. देव खनाल ६. दीपेन्द्र सिंह ऐरी ७. बसिर अहमद ८. इसान पाण्डे ९. गुल्सन कुमार झा १०. शेर मल्ल ११. ललित नारायण राजबंशी १२. करण केसी १३. हेमन्त धामी १४. सन्दीप जोरा
-1786697098.png)
