कतारमा आयोजना हुने एसिसी मेन्स एसिया कप राइजिङ स्टार्स २०२६ खेल्ने नेपाली टोलीमा दुई खेलाडी परिवर्तन गरिएको छ।
सोमपाल कामीको घाइते भएपछि उनको स्थानमा प्रतिश जिसीलाई समावेश गरिएको छ भने यसअघि ट्राभलिङ रिजर्भमा रहेका मयन यादवलाई पनि मुख्य टोलीमा राखिएको छ।
सोमपाल नेपाल प्रिमियर लिगको अन्तिम खेलमा घाइनते भएका थिए।
यद्यपि, १६ सदस्यीय नेपाली टोलीमा रहेका चार खेलाडी भने प्रतियोगिताका लागि हालसम्म कतार पुग्न सकेका छैनन्। देव खनाल, इशान पाण्डे, सन्दीप जोरा र अभिषेश गौतम नेपाल प्रिमियर लिग (एनपिएल) को प्लेअफ खेलका कारण नेपालमै रोकिएका हुन्।
देव चितवन राइनोजमा आबद्ध छन् भने सन्दीप जोरा र अभिषेश गौतम लुम्बिनी लायन्सबाट खेलिरहेका छन्। इशान पाण्डे भने सुदूरपश्चिम रोयल्समा आबद्ध छन्।
सन्दीप लामिछानेको कप्तानीमा रहेको नेपाली टोलीका अन्य खेलाडी यसअघि नै प्रतियोगितामा सहभागी हुन कतारको दोहा पुगिसकेका छन्।
नोभेम्बर १९ देखि २९ सम्म सञ्चालन हुने प्रतियोगिता ५० ओभरको हुनेछ। नेपालले नोभेम्बर २० मा भारत ‘ए’ विरुद्ध खेल्दै प्रतियोगिताको सुरुवात गर्नेछ। त्यसपछि नोभेम्बर २३ मा यूएई र नोभेम्बर २५ मा पाकिस्तान शाहिन्ससँग प्रतिस्पर्धा गर्नेछ।
नेपाल समूह ‘बी’ मा रहेको छ। यस समूहमा भारत ‘ए’, पाकिस्तान शाहिन्स र यूएई छन्। समूहका शीर्ष दुई टोली सेमिफाइनलमा प्रवेश गर्नेछन्।
प्रतियोगिताको पहिलो सेमिफाइनल नोभेम्बर २६, दोस्रो सेमिफाइनल नोभेम्बर २७ र फाइनल नोभेम्बर २९ मा हुनेछ।
**नेपालको १६ सदस्यीय टोली**
1. सन्दीप लामिछाने (कप्तान)
2. बासिर अहमद
3. अर्जुन कुमाल
4. नन्दन यादव
5. पवन सर्राफ
6. ललित राजवंशी
7. लोकेश बम
8. कुशल भुर्तेल
9. प्रतिश जिसी
10. दीपक डुम्रे
11. सन्दीप जोरा
12. अभिषेक गौतम
13. इशान पाण्डे
14. राशिद खान
15. देव खनाल
16. मयन यादव