प्रधानमन्त्री बालेन शाहको आसन्न भारत भ्रमणमा अर्थमन्त्री स्वर्णिम वाग्ले र परराष्ट्रमन्त्री शिशिर खनाल मात्र सहभागी हुने भएका छन्।
उच्च सरकारी स्रोतका अनुसार यसअघि प्रधानमन्त्रीसँग पर्यटन तथा नागरिक उड्डयनमन्त्री खडकराज पौडेल, ऊर्जामन्त्री विराजभक्त श्रेष्ठ र पूर्वाधार विकास मन्त्री सुनील लम्साल पनि भारत जानेबारे छलफल भइरहेको थियो।
तर पछिल्लो तयारी अनुसार अर्थ र परराष्ट्रमन्त्री मात्र जाने टुंगो लागेको स्रोतले बतायो।
प्रधानमन्त्री शाह नोभेम्बर २२ मा भारत जाने र २३ मा स्वदेश फर्किने कार्यक्रम छ।
प्रधानमन्त्रीको भ्रमण क्रममा नेपाल र भारतबीच हवाई प्रवेशमार्ग, ऊर्जा तथा भौतिक पूर्वाधारसम्बन्धी केही महत्त्वपूर्ण समझदारी हुने अपेक्षा गरिएको थियो। यिनै विषयमा सम्झौता हुन सक्ने सम्भावनालाई ध्यानमा राखेर सम्बन्धित मन्त्रालयका मन्त्रीलाई पनि भ्रमण टोलीमा समावेश गर्नेबारे छलफल भएको थियो।
तर अब ती मन्त्रालयका मन्त्री भ्रमणमा सहभागी नहुने भएपछि सम्बन्धित विषयमा सम्झौता हुने सम्भावना कम भएको अर्को सरकारी स्रोतको आकलन छ।
'पर्यटन, ऊर्जा र भौतिक पूर्वाधारसम्बन्धी समझदारी हुने अपेक्षाका आधारमा सम्बन्धित मन्त्रीहरू जाने कुरा थियो,' ती स्रोतले भने, 'अब उनीहरू नजाने भएपछि ती विषयमा सम्झौता नहुने अनुमान गरिएको छ।'
प्रधानमन्त्रीको भ्रमणअघि नेपाल र भारतबीच विभिन्न विषयमा छलफल भइरहेको छ। विशेषगरी नेपालले भारतसँग थप हवाई प्रवेशमार्ग उपलब्ध गराउन आग्रह गर्दै आएको छ।
पोखरा र भैरहवाका अन्तर्राष्ट्रिय विमानस्थलमा भारततर्फबाट आउने अन्तर्राष्ट्रिय उडान सहज बनाउन थप हवाई प्रवेशमार्ग आवश्यक रहेको नेपालको भनाइ छ।
त्यस्तै, ऊर्जा तथा पूर्वाधार विकासका विभिन्न आयोजना पनि दुई देशबीच छलफलका विषय हुन्।
प्रधानमन्त्रीसँग दुई मन्त्री मात्र जाने पछिल्लो निर्णयले भ्रमण क्रममा हुने सम्भावित सम्झौता र समझदारीमा कस्तो प्रभाव पार्छ भन्ने अझै स्पष्ट भएको छैन।