फ्रेञ्च लिग वानमा पिएसजी शीर्ष स्थानमा उक्लन सफल भएको छ।
शुक्रबार राति भएको खेलमा निम्समाथि ४-० को जित निकाल्दै डिफेन्डिङ च्याम्पियन पिएसजी सिजनमा पहिलो पटक अंक तालिकाको शीर्ष स्थानमा पुगेको हो।
निम्स खेलको १२औं मिनेटमै १० खेलाडीमा सीमित बनेको थियो। निम्सका डिफेन्डर लोइक लान्द्रेले पिएसजीका राफिन्हालाई पेटमा समातेपछि उनलाई रेफ्रीले सिधा रातो कार्ड देखाउँदै मैदान बाहिर पठाएका थिए।
त्यसपछि सहज स्थितिमा रहेको पिएसजीका लागि केलियन एमबाप्पेले खेलको ३२ मिनेट पहिलो गोल गरे।
पिएसजीले थप तीन गोल दोस्रो हाफमा गर्यो। फ्लोरेन्जीले ७७ मिनेटमा दोस्रो गोल गरेका थिए।
८३ मिनेटमा एमबाप्पेले टिमका लागि तेस्रो तथा व्यक्तिगत दोस्रो गोल गरे। खेल सकिन २ मिनेट बाँकी छदा साराबियाले पिएसजीका लागि चौथो गोल गरेका थिए।
जितसँगै पिएसजी ७ खेलबाट १५ अंक जोड्दै शीर्ष स्थानमा पुगेको हो। गोलअन्तरमा पछि पर्दै दोस्रो स्थानमा झरेको रेनेसको पनि १५ अंक छ।
रेनेस शुक्रबार भएको खेलमा डिजोनसँग १-१ गोलको बराबरीमा रोकिएको फाइदा पिएसजीलाई पुग्यो।