युरो २०२० मा समूहका विजेता र उपविजेतासहित तेस्रो हुने टिमले पनि अन्तिम १६ मा स्थान बनाउने प्रावधान छ। समूहमा तेस्रो हुने ६ टिम मध्ये ४ टिमले मात्र अन्तिम १६ मा अवसर पाउनेछन्।
उत्कृष्ट तेस्रो टिम बनेर अन्तिम १६ मा पुग्नका लागि ६ समूहमा तेस्रो हुने टिममध्ये बढी अंक ल्याउनु पर्ने हुन्छ। यदि समान अंक भएमा गोलअन्तर, गरेको गोल संख्या, जित संख्या र प्राप्त कार्ड संख्यालाई क्रमश: आधार मानिनेछ। यी आधारमा पनि बराबरी भएमा युरो छनोटमा प्राप्त अंकलाई आधार मानिनेछ।
उत्कृष्ट तेस्रो टिमको रूममा अहिलेसम्म समूह 'ए' बाट स्विट्जरल्यान्ड र समूह 'डी' बाट चेक गणतन्त्र अन्तिम १६ मा पुग्नेछन्। अब दुई टिमको टुंगो आज राति हुने समूह चरणका अन्तिम खेलहरूपछि लाग्नेछ।
समूह 'ई' र 'एफ' अघिको तेस्रो हुने टिमको अकं तालिकामा चेक शीर्ष स्थानमा छ। दोस्रो स्थानमा स्विट्जरल्यान्ड छ भने पोर्चुगल तेस्रो स्थानमा छ। पोर्चुगलको अन्तिम खेलपछि समूहमा पोजिसन फरक पर्न सक्नेछ।
यस्तै युक्रेन चौथो स्थानमा छ भने फिनल्यान्ड पाँचौ र स्पेन छैटौ स्थानमा छ। स्पेनले पनि अन्तिम खेल खेल्न बाँकी रहेकाले उसको स्थान फरक हुन सक्नेछ।
युरो २०२० मा बुधबार चार खेल हुँदैछन्। जसमा राति ९:४५ बजे समूह 'ई' का अन्तिम खेल हुँदैछन् भने राति १२:४५ बजे समूह 'एफ' का खेल हुनेछन्।
आजका खेलहरू
समूह ई
- स्लोभाकिया भर्सेस स्पेन - ९:४५ बजे - सेभिया
- स्विडेन भर्सेस पोल्यान्ड - ९:४५ बजे - सेन्ट पिटर्सवर्ग
समूह एफ
- जर्मनी भर्सेस हंगेरी - १२:४५ बजे - म्युनिख
- फ्रान्स भर्सेस पोर्चुगल - १२:४५ बजे - बुडापेस्ट
अन्तिम १६ मा पुग्न कसलाई के चाहिन्छ?
समूह 'ई'
स्विडेन : स्विडेन अन्तिम खेलअघि नै अन्तिम १६ मा पुगिसकेको छ। यदि स्विडेनले पोल्यान्डलाई पराजित गरे समूह विजेता हुनेछ। यदि स्विडेन पराजित भए तेस्रो हुनेछ। बराबरी भए पनि कम्तिमा तेस्रो हुनेछ।
स्लोभाकिया : स्लोभाकियालाई अन्तिम १६ मा पुग्न एक अंकको खाँचो छ। जित हात पारे कम्तिमा दोस्रो हुनेछ। पराजित भए स्लोभाकिया बाहिरिन सक्छ।
स्पेन : स्पेनले अन्तिम १६ मा स्थान बनाउन स्लोभाकियालाई पराजित गर्नु पर्छ। स्पेनले स्लोभाकियासँग बराबरी खेलेमा र अर्को खेलमा पोल्यान्डले स्विडेनलाई हराउन नसके पनि स्पेन अन्तिम १६ मा पुग्नेछ।
पोल्यान्ड : पोल्यान्डलाई अन्तिम १६ मा पुग्न जितको खाँचो छ।
समूह एफ
फ्रान्स : फ्रान्स अन्तिम १६ मा पुगिसकेको छ। यदि जित हात पारे फ्रान्स समूह विजेता बन्नेछ। पोर्चुगलसँग बराबरी खेले र अर्को खेलमा जर्मनीले हंगेरीलाई पराजित गर्न नसके पनि फ्रान्स समूह विजेता बन्नेछ। यदि फ्रान्स पराजित भएमा र हंगेरीले जितेमा फ्रान्स दोस्रो टिम वा तेस्रो टिम हुनेछ।
जर्मनी : हार टार्न सके जर्मनी अन्तिम १६ मा पुग्नेछ। जर्मनीले जित हात पारेमा र अर्को खेलमा फ्रान्सले जित हात पार्न नसके जर्मनी समूह विजेता बन्नेछ। जर्मनीले बराबरी खेले र फ्रान्सले हारे उत्कृष्ट तेस्रो टिमको रुपमा अन्तिम १६ मा पुग्नेछ। पराजित भएमा भने जर्मनी बाहिरिन सक्छ।
पोर्चुगल : हार टार्न सके पोर्चुगलको अन्तिम १६ मा स्थान पक्का हुनेछ। पोर्चुगलले फ्रान्सलाई हराए र अर्को खेलमा जर्मनीले जित हात पारे पोर्चुगल समूह विजेता हुन सक्नेछ। जर्मनी र पोर्चुगल दुवै टिम पराजित भएको अवस्थामा पोर्चुगल चौथो भएर बाहिरिनेछ।
हंगेरी : जित हात पारे हंगेरी अन्तिम १६ मा पुग्नेछ। हंगेरीले जित हात पार्दा र अर्को खेलमा फ्रान्स पराजित भए गोलअन्तरको आधारमा दोस्रो हुने टिमको टुंगो लाग्नेछ। अर्को खेल बराबरीमा सकिएमा र हंगेरीले जित हात पारे उसले तेस्रो स्थान हात पार्नेछ।
