म्यानचेस्टर युनाइटेडका डिफेन्डर लिसान्ड्रो मार्टिनेजले विपक्षी खेलाडीको कपाल तानेपछि रातो कार्ड पाएका छन्।
ओल्ड ट्राफोर्डमा भएको खेलमा लिड्स युनाइटेडसँग २-१ ले पराजित भएपछि म्यानचेस्टर युनाइटेडका प्रशिक्षक माइकल क्यारिकले रेफ्रीको यो निर्णयलाई 'इतिहासकै खराब निर्णय' मध्येको एक बताएका छन्।
२८ वर्षीय अर्जेन्टिनी डिफेन्डर मार्टिनेजले लिड्सका स्ट्राइकर डोमिनिक काल्भर्ट-लेविनको कपाल तानेका थिए। खेलको पहिलो हाफमा नोआ ओकाफोरको दुई गोलका कारण युनाइटेड २-० ले पछि परेको बेला यो घटना भएको थियो।
सुरुमा रेफ्रीले वास्ता नगरे पनि भिडियो असिस्टेन्ट रेफ्रीको सल्लाहमा मैदानको स्क्रिनमा फुटेज हेरेपछि रेफ्री पल टियरनीले मार्टिनेजलाई 'हिंसात्मक व्यवहार' गरेको भन्दै सिधै रातो कार्ड देखाए।
युनाइटेडका प्रशिक्षक माइकल क्यारिक यो निर्णयबाट निकै आक्रोशित देखिए। उनले भने, "यो निर्णय निकै स्तब्ध पार्ने खालको छ। मार्टिनेजले मात्र छुन खोजेका थिए, कुनै आक्रामक व्यवहार गरेका थिएनन्।"
यता, कपाल तानिएका खेलाडी काल्भर्ट-लेविनले भने, 'मैले मेरो कपाल तानिएको महसुस गरेँ र रेफ्रीलाई भनेँ। रेफ्रीले नियम अनुसार निर्णय लिए, म कसैप्रति रिस राख्दिनँ।'
पूर्व स्टार खेलाडीहरू रोय किन र जेमी क्याराघेरले युनाइटेडप्रति सहानुभूति देखाएका छन्। उनीहरूका अनुसार मार्टिनेजको कार्यलाई रातो कार्ड नै दिनु अलि बढी कडा निर्णय थियो। तर, ग्यारी नेभिलले भने मार्टिनेजले के गरिरहेका छन् भन्ने उनलाई राम्ररी थाहा भएको र आजकलको नियममा कपाल तान्नु रातो कार्ड नै हुने बताए।
यो रातो कार्डका कारण मार्टिनेजले अब आगामी तीनवटा खेल गुमाउनेछन्। यसअघिको खेलमा ह्यारी म्यागुइरले पनि रातो कार्ड पाएका कारण प्रतिबन्धमा छन्। अब चेल्सी विरुद्धको महत्वपूर्ण खेलमा म्यानचेस्टर युनाइटेडसँग १९ वर्षीय एडन हेभन र २० वर्षीय लेनी योरो मात्र फिट डिफेन्डरका रूपमा बाँकी छन्। यसले टोलीको रक्षापंक्तिमा ठूलो समस्या निम्त्याउने देखिएको छ।
