जर्मन क्लब बायर्न म्युनिखले स्पेनिस महारथी रियल म्याड्रिडलाई हराउँदै च्याम्पियन्स लिगको सेमिफाइनलमा साविक विजेता पेरिस सेन्ट-जर्मेन (पिएसजी) सँगको भेट पक्का गरेको छ।
सात गोल भएको यो अत्यन्तै रोमाञ्चक खेलमा बायर्नले ४-३ को जित निकाल्यो। समग्रमा ६-४ को नतिजासहित बायर्न अघिल्लो चरण प्रवेश गरेको हो।
खेलको पहिलो हाफमै पाँच गोल भएका थिए। खेल सुरु भएको ३५ सेकेन्डमै रियलका अर्दा गुलरले गोल गर्दै अग्रता दिलाएका थिए। तर, पाँच मिनेटमै बायर्नका पाभ्लोभिचले गोल फर्काउँदै खेल बराबरीमा ल्याए।
त्यसपछि गुलरले व्यक्तिगत दोस्रो गोल गर्दै रियललाई फेरि अघि बढाए। बायर्नका ह्यारी केनले आफ्नो सिजनको ५०औँ गोल गर्दै फेरि बराबरी गरे पनि पहिलो हाफ सकिनुअघि केलियन एमबाप्पेले गोल गरेपछि रियल ३-२ ले अगाडि रह्यो।
दोस्रो हाफमा खेल केही सुस्त भयो। तर अन्तिम समयमा खेलले नयाँ मोड लियो। खेल सकिन चार मिनेट बाँकी छँदा रियलका एडुआर्डो कामाविङ्गाले रातो कार्ड पाएपछि रियल १० खेलाडीमा सीमित भयो।
यसको फाइदा उठाउँदै ८९औँ मिनेटमा लुइस डियाजले उत्कृष्ट गोल गरेर खेल ३-३ को बराबरीमा ल्याए। इन्जुरी समयमा माइकल ओलिसेले अर्को गोल थपेपछि बायर्न ४-३ ले विजयी भयो। खेल सकिएपछि रेफ्रीसँग विवाद गरेका कारण रियलका गुलरले पनि रातो कार्ड पाए।
अर्को खेलमा आर्सनलले पोर्चुगिज क्लब स्पोर्टिङसँग गोलरहित बराबरी खेल्दै सेमिफाइनलमा स्थान सुरक्षित गरेको छ। पहिलो लेगमा काइ हाभर्ट्जले गरेको एक मात्र गोल आर्सनललाई अन्तिम चारमा पुर्याउन पर्याप्त बन्यो।
यस जितसँगै आर्सनल इतिहासमा पहिलो पटक लगातार दुई पटक च्याम्पियन्स लिगको सेमिफाइनलमा पुग्न सफल भएको छ। अब फाइनल प्रवेशका लागि आर्सनलले एथ्लेटिको म्याड्रिडको सामना गर्नेछ।
सेमिफाइनलमा अब पहिलो लेगमा अप्रिल २८ (मंगलबार) मा पिएसजी र बायर्न म्युनिख तथाअप्रिल २९ (बुधबार) एथ्लेटिको म्याड्रिड र आर्सनल भिड्नेछन्।
