विराटनगरमा जारी ३८औं संस्करणको नोबेल विराट गोल्डकपको उपाधि भिडन्त आज ( शनिबार ) उपाधिका लागि पूर्वविजेता झापा–११ र घरेलु टोली सम्राट स्पोर्टिङ क्लब आमनेसामने हुँदैछन्।
सहिद रंगशालामा शनिबार बेलुका ७ बजेदेखि सुरु हुने फाइनल खेलमा दुवै टोली उपाधि जित्ने लक्ष्यसहित मैदान ओर्लने तयारीमा छन्।
अनुभव र इतिहास बोकेको झापा–११ दोस्रो पटक ट्रफी उचाल्ने लक्ष्यमा छ भने पहिलो सहभागितामै फाइनल पुगेको सम्राट घरेलु समर्थकको साथमा ऐतिहासिक सफलता हासिल गर्न चाहन्छ।
झापा–११ ले यसअघि २०७१ सालमा त्रिभुवन आर्मी क्लबलाई पराजित गर्दै उपाधि जितेको थियो। यसपटक पनि उसले बलिया विभागीय टोलीहरू—आर्मी र नेपाल पुलिस क्लब—लाई हराउँदै फाइनल यात्रा तय गरेको हो।
घरेलु टोली सम्राट स्पोर्टिङ क्लबले पहिलो सहभागितामै प्रभावशाली प्रदर्शन गर्दै सबैको ध्यान खिचेको छ।
क्वाटरफाइनलमा भारतको बिर्सामुण्डा स्पोर्ट्स एकेडेमीलाई ३–१ ले पराजित गरेको सम्राटले सेमिफाइनलमा लिग च्याम्पियन चर्च ब्वाइज युनाइटेडलाई पनि ३-० को अन्तरले हराउँदै फाइनलमा स्थान सुरक्षित गरेको हो।
फाइनल अघि दुवै टोली आत्मविश्वासी देखिएका छन् ।
सम्राटका प्रशिक्षक पारस चौधरीले घरेलु मैदान र दर्शकको साथलाई आफ्नो टोलीको सबैभन्दा ठूलो बल भएको बताए।
उनले पहिलो सहभागितामै फाइनल पुग्नु उल्लेखनीय उपलब्धि भएको भन्दै फाइनलमा उत्कृष्ट प्रदर्शन गर्ने दाबी गरे। साथै, प्रमुख खेलाडी कोमल खवासलाई मैदानमा उतारिने जानकारी पनि दिए।
सम्राटका कप्तान अशोक खवासले सेमिफाइनलमा देखिएका फिनिसिङका कमजोरी सुधार गरेर फाइनलमा अझ मजबुत प्रदर्शन गर्ने बताए।
झापा–११ का प्रशिक्षक गणेश खड्काले आफू खेलाडी हुँदा जितेको उपाधि प्रशिक्षकका रूपमा पनि दोहोर्याउने लक्ष्य राखेको बताए।
उनले आफ्नो टोलीमा रहेका विदेशी खेलाडीहरूको योगदान महत्वपूर्ण हुने उल्लेख गर्दै सम्राटलाई कमजोर नआँकिएको स्पष्ट पारे।
झापाका कप्तान पुजन थापाले युवा र विदेशी खेलाडीको राम्रो संयोजनले टोलीलाई बलियो बनाएको उल्लेख गर्दै दोस्रो पटक उपाधि जित्ने विश्वास व्यक्त गरे।
चैत २८ गतेदेखि सुरु भएको प्रतियोगितामा भारतसहित आठ टोलीको सहभागिता थियो। प्रतियोगिताको विजेताले ११ लाख रुपैयाँ र उपविजेताले ५ लाख रुपैयाँ पुरस्कार पाउनेछन्।
त्यस्तै, सर्वोत्कृष्ट खेलाडीलाई ५१ हजार तथा विधागत उत्कृष्ट खेलाडीहरूलाई जनही १५–१५ हजार रुपैयाँ प्रदान गरिने आयोजकले जनाएको छ।
