स्पेनिस क्लब बार्सिलोनालाई सेल्टा भिगोविरुद्ध कठिन जित दिलाउने क्रममा १८ वर्षीय स्टार खेलाडी लामिन यामल घाइते भएका छन्। उनले गरेको पेनाल्टी गोलकै मद्दतले बार्सिलोनाले ला लिगाको अङ्क तालिकामा ९ अङ्कको अग्रता बनाउन सफल भएको छ।
खेलको ४०औँ मिनेटमा यामल बल लिएर डि-बक्सभित्र छिर्न खोज्दा सेल्टाका खेलाडी योएल लागोले उनलाई लडाएका थिए। त्यसपछि पाएको पेनाल्टीमा यामलले उत्कृष्ट गोल गरे। तर, गोल गर्ने बित्तिकै उनले आफ्नो देब्रे खुट्टाको मांशपेशी (ह्यामस्ट्रिङ) समाउँदै बेन्चतर्फ इशारा गरे र मैदानमै बसे।
चोट लागेपछि उनी चिकित्सकहरूको सहयोगमा लंगडाउँदै मैदानबाट बाहिरिए र उपचारका लागि सिधै टनेलतर्फ लागे। उनको ठाउँमा रुनी बार्घजीलाई मैदान प्रवेश गराइएको थियो।
यो जितसँगै साविक विजेता बार्सिलोना उपाधि रक्षाको निकै नजिक पुगेको छ। अब लिगमा ६ खेल मात्र बाँकी छन्।
बार्सिलोनाका प्रशिक्षक हान्सी फ्लिक अहिले निकै चिन्तित छन्। अर्को महिना चिरपरिचित प्रतिद्वन्द्वी रियल मड्रिडसँग 'एल क्लासिको' भिडन्त हुँदैछ। त्यस्तै, जुन महिनामा हुने विश्वकपका कारण स्पेनको राष्ट्रिय टोली पनि यामलको चोटलाई लिएर तनावमा छ।
यस सिजन यामलले ला लिगामा १६ गोल गरिसकेका छन् भने ११ गोलमा पास (असिस्ट) मिलाएका छन्। स्पेनले युरो २०२४ को उपाधि जित्दा उनी प्रतियोगिताकै 'उत्कृष्ट युवा खेलाडी' चुनिएका थिए।
बार्सिलोनाका मिडफिल्डर पेड्रीले यामलको चोटबारे भने, ‘आशा छ उनको चोट धेरै गम्भीर छैन। भोलि परीक्षण भएपछि मात्र वास्तविक अवस्था थाहा हुनेछ। उनी अझै धेरै युवा छन्, त्यसैले उनी छिट्टै निको भएर मैदान फर्कनेमा म विश्वस्त छु।’
