म्यानचेस्टर सिटीले बर्नलीलाई उसकै मैदानमा हराउँदै इंग्लिस प्रिमियर लिगको शीर्ष स्थानमा पुगेको छ। यो जितसँगै सिटी अङ्क तालिकाको पहिलो स्थानमा उक्लिएको छ भने पराजित बर्नली लिगबाट घटुवा (रेलिगेसन) भएर दोस्रो डिभिजन (च्याम्पियनसिप) मा झरेको छ।
खेल सुरु भएको ५ मिनेटमै स्टार स्ट्राइकर एर्लिङ हालान्डले गोल गरेका थिए। जेरेमी डोकुको पासलाई नियन्त्रणमा लिँदै हालान्डले बर्नलीका गोलकिपर मार्टिन दुब्राभ्कालाई छक्याएर सुन्दर गोल गरे। दोस्रो हाफमा पनि उनको एक प्रहार पोलमा लागेर फर्किएको थियो।
पेप ग्वार्डिओलाको टोलीले अचम्मको पुनरागमन गरेको छ। पछिल्लो दुई हप्ताभन्दा कम समयमै आर्सनलसँगको ९ अङ्कको दूरी मेटाउँदै सिटीले गोल सङ्ख्याका आधारमा शीर्ष स्थान ओगटेको हो। सिटीको ३३ खेलबाट ७० अंक छ भने आर्सनलको पनि ७० अंक नै छ। गोलअन्तर पनि समान हुँदा बढी गोल गरेको आधारमा सिटी शीर्ष स्थानमा छ।
सिजनको पहिलो हप्तापछि सिटी पहिलो पटक शीर्ष स्थानमा पुगेको हो। विगत ११ खेलदेखि अपराजित सिटी अब उपाधि जित्नबाट मात्र ५ खेल टाढा छ।
सिटीले खेलभरि धेरै मौकाहरू पाएको थियो। रायन चेर्कीको कडा प्रहारलाई बर्नलीका गोलकिपरले उत्कृष्ट बचाउ गर्दै क्रसबार माथि पठाइदिएका थिए। त्यस्तै निको ओ'रेली र रायन ऐत-नुरीले पनि गोल गर्ने अवसर गुमाएका थिए।
अर्कोतर्फ, बर्नलीले पनि खेल जोगाउने प्रयास नगरेको होइन। जाइडन एन्थोनीको एउटा प्रहारलाई सिटीका गोलकिपर जियानलुइजी डोनारुम्माले विफल तुल्याइदिए भने जियान फ्लेमिङको प्रहार पोस्टभन्दा बाहिर गयो।
यो हारसँगै प्रशिक्षक स्कट पार्करको टोली बर्नली अब अर्को सिजन प्रिमियर लिगमा हुनेछैन। पुछारमा रहेको 'उल्भ्स' पछि रेलिगेसनमा पर्ने बर्नली दोस्रो टोली बनेको छ। पछिल्लो तीन वर्षमा बर्नली दोस्रो पटक तल्लो डिभिजनमा झरेको हो।
