अखिल नेपाल फुटबल संघ (एन्फा) मा फिफा विश्वकप २०२६ का लागि प्राप्त अनलाइन टिकटहरूको बिक्री तथा वितरणमा गम्भीर अनियमितता र अपचलन भएको भन्दै जिल्ला अदालत ललितपुरमा दायर अभियोगपत्रले नयाँ तथ्यहरू उजागर गरेको छ।
अन्तर्राष्ट्रिय फुटबल महासंघ (फिफा) ले नेपाली फुटबल प्रवर्द्धनका लागि एन्फालाई ३३० थान अनलाइन टिकट उपलब्ध गराएको थियो। नियमानुसार यी टिकटहरू जिल्ला, प्रदेश, डिभिजन क्लब, पूर्व तथा वर्तमान राष्ट्रिय खेलाडी, रेफ्री र प्रशिक्षकहरूलाई पारदर्शी रूपमा वितरण गरिनुपर्थ्यो।
तर ती टिकटहरूको स्पष्ट हिसाब-किताब र अभिलेख नराखी व्यक्तिगत पहुँचका आधारमा हस्तान्तरण गरिएको र फेसबुकमार्फत कालोबजारीका लागि बिक्रीमा राखिएको अनुसन्धानबाट खुलेको छ।
एन्फा केन्द्रीय सदस्य सरिला श्रेष्ठ मलेकुको बयान
अदालतमा दायर अभियोगपत्रमा संलग्न बयान कागजात अनुसार एन्फाकी केन्द्रीय कार्यसमिति सदस्य सरिला श्रेष्ठ मलेकुले एन्फामा बिक्री नभएका टिकटहरू आफ्ना चिनजानका व्यक्तिहरूलाई उपलब्ध गराउन आफ्नो नाममा ४ थान टिकट बुक गरेको स्वीकार गरेकी छन्।
टिकटको विवरण र भुक्तानी: उनले जोर्डन र अर्जेन्टिनाबीचको म्याचका २ थान टिकट पाँच सय डलर र क्वाटरफाइनल म्याचका २ थान टिकट ७ सय ३५ डलर आफ्नो कुमारी बैंकको खाताबाट एन्फाको बैंक खातामा दाखिल गरेकी थिइन्।
टिकट हस्तान्तरण: ती टिकटहरूमध्ये अर्जेन्टिना म्याचका २ थान टिकट आफ्नी साथी रोजी प्रधानलाई दिएर नगद १ लाख ५० हजार लिएको र क्वाटरफाइनलका २ थान टिकट आफ्नी बहिनी बेन्जु श्रेष्ठमार्फत नचिनेका व्यक्तिहरू (रवि रञ्जन कुमार र बलराम उपाध्याय) लाई एन्फाबाट सोझै इमेल ट्रान्सफर गराएको उनले उल्लेख गरेकी छन्।
कमिसन नलिएको दाबी: आफूले सो टिकट खरिद-बिक्री बापत कुनै थप रकम वा कमिसन नलिएको र फेसबुकमा "विनोद अधिकारी" नामको प्रोफाइलबाट बिक्रीमा राखिएको विषयमा आफूलाई जानकारी नभएको दाबी उनले बयानमा गरेकी छन्।
अन्य पदाधिकारी तथा सम्बन्धित व्यक्तिको भनाइ
कोषाध्यक्ष रवीन्द्र जोशी: एन्फाका कोषाध्यक्ष रवीन्द्र जोशीले सरिला श्रेष्ठ मलेकुले विश्वकपका टिकटहरू खरिद गरेको पुष्टि गरे पनि ती टिकट कसलाई दिइयो र फेसबुकमा कसरी पुग्यो भन्नेबारे आफूलाई जानकारी नभएको बताएका छन्।
लेखा अधिकृत सञ्जीव पाण्डे: मुख्य लेखापाल/लेखा अधिकृत सञ्जीव पाण्डेले फेसबुकमा विनोद अधिकारीले बिक्रीका लागि पोस्ट गरेका २ थान क्वाटरफाइनलका टिकटहरू सरिला श्रेष्ठ मलेकुलाई नै बिक्री गरिएका टिकटहरू भएको खुलासा गरेका छन्।
रवि रञ्जन कुमार: टिकट प्राप्त गर्ने रवि रञ्जन कुमारले आफूले अमेरिकाको भिसा दुई पटकसम्म नपाएपछि टिकट खेर नजाओस् भनेर न्यूयोर्क बस्ने साथीमार्फत विनोद अधिकारीलाई टिकट हस्तान्तरण गरेको र उनले फेसबुकमा पोस्ट गर्दा विवाद भएपछि पोस्ट डिलीट गराई मन्त्रालयमा स्पष्टीकरण बुझाएको बयान दिएका छन्।
अभियोगपत्र अनुसार संस्थागत प्रयोजनका लागि प्राप्त ३३० थान टिकटहरूको स्पष्ट अभिलेख र हिसाब-किताब एन्फाका कोषाध्यक्ष र लेखा अधिकृतले पेश गर्न सकेका छैनन्। एन्फा पदाधिकारीहरूको पहुँचका आधारमा झिकाइएका टिकटहरू गैर-आधिकारिक माध्यमबाट हस्तान्तरण भई सामाजिक सञ्जालमा खुल्ला बिक्री (कालोबजारी) मा राखिएकाले विश्वकप टिकट व्यवस्थापनमा गम्भीर अपचलन र ठगी भएको अभियोगपत्रमा ठहर गरिएको छ।
.JPG)
