टोटनह्यामका मुख्य प्रशिक्षक रोबर्टो डे जर्बीले म्यानचेस्टर युनाइटेडविरुद्धको खेलमा रातो कार्ड पाएका आफ्ना मिडफिल्डर रोड्रिगो बेन्टानकुरको प्रशंसा गरेका छन्। इंग्लिस प्रिमियर लिगको उक्त खेल १–१ को बराबरीमा सकिएको थियो।
ओल्ड ट्राफोर्डमा भएको खेलमा टोटनह्याम १–० ले पछाडि रहेका बेला ७८औँ मिनेटमा मैदानमा तनावपूर्ण अवस्था सिर्जना भयो। त्यसक्रममा उरुग्वेका मिडफिल्डर बेन्टानकुरले म्यानचेस्टर युनाइटेडका लुक शलाई टाउकोले हानेपछि रेफ्रीले उनलाई रातो कार्ड देखाए।
१० खेलाडीमा सीमित भए पनि टोटनह्यामले खेलको अन्तिम समयमा बराबरी गोल फर्काउँदै एक अंक जोगायो। खेलको इन्जुरी समयको दोस्रो मिनेटमा डोमिनिक सोलान्केले हेडरमार्फत गोल गरेका थिए।
प्रिमियर लिगमा छ खेल खेलिसक्दा पनि टोटनह्यामले यस सिजन जित निकाल्न सकेको छैन। तर, प्रशिक्षक डे जर्बीले म्यानचेस्टर युनाइटेडविरुद्धको खेलमा आफ्नो टोलीमा जोस र आक्रामक भावना जगाउन बेन्टानकुरको घटनाले भूमिका खेलेको बताए।
खेलपछि पत्रकार सम्मेलनमा डे जर्बीले भने, ‘म रोड्रिगोलाई चुम्बन गर्छु र धन्यवाद भन्छु। त्यो क्षणमा सायद १० खेलाडीमा सीमित भएपछि हामीले अझ बढी साहस र ऊर्जा देखाएर खेल्यौँ। लामो समयदेखि टोटनह्याममा त्यो जोस, त्यो चरित्र देखिएको थिएन।’
के भएको थियो मैदानमा?
खेलको ७८औँ मिनेटमा बेन्टानकुरले लुक शमाथि खतरनाक ट्याकल गरेका थिए। त्यसपछि आक्रोशित बनेका श बेन्टानकुरतर्फ दौडिए र उनलाई धकेल्दै मैदानबाहिर पुर्याए।
त्यसको जवाफमा बेन्टानकुरले आफ्नो टाउको शको अनुहारतर्फ प्रहार गरे। दुवै टोलीका खेलाडीले उनीहरूलाई छुट्याएपछि रेफ्री स्टुअर्ट एटवेलले वैकल्पिक खेलाडीका रूपमा मैदान प्रवेश गरेका बेन्टानकुरलाई रातो कार्ड देखाए।
डे जर्बीले बेन्टानकुरको प्रतिक्रिया गल्ती भएको स्वीकार गरे। तर, खेलको अन्त्यसम्म हार नस्वीकार्ने मानसिकता देखाउन टोटनह्यामलाई यस्तै चरित्र आवश्यक रहेको उनको भनाइ थियो।
स्काई स्पोर्ट्ससँग कुरा गर्दै उनले भने, ‘मैले ड्रेसिङ रुममा बेन्टानकुरलाई चुम्बन गरेँ, किनकि हामीलाई यस्तै प्रतिक्रिया र चरित्र चाहिएको छ। फुटबल भनेकै चरित्र हो।’
उनले थपे, ‘रातो कार्ड आएको घटनामा देखिएको प्रतिक्रिया मलाई मन पर्यो। अहिले हामीलाई यस्तो अवस्था आवश्यक छ। रातो कार्ड पाउनुपर्छ भन्ने होइन, तर हामीले हार स्वीकार गर्नु हुँदैन।’
डे जर्बीको भनाइको आशय बेन्टानकुरले टाउकोले हानेको कार्य सही थियो भन्ने होइन। उनले त्यस घटनामा देखिएको आक्रामकता र हार नमान्ने भावनालाई सकारात्मक रूपमा लिएका हुन्।
