जापानमा आयोजना हुन लागेको २०औँ एशियाली खेलकुदमा नेपालबाट ई-स्पोर्ट्सका खेलाडीहरू सहभागी नहुने सम्बन्धमा राष्ट्रिय खेलकुद परिषद् (राखेप) ले आफ्नो धारणा सार्वजनिक गरेको छ।
ई-स्पोर्ट्स सहभागिताका विषयमा विभिन्न समाचारहरू सार्वजनिक भएपछि परिषद्ले प्रेस विज्ञप्तिमार्फत यसबारे स्पष्ट पारेको हो।
राखेपका अनुसार आगामी असोज ३ गतेदेखि सुरु हुने एशियाली खेलकुदका लागि नेपाल ओलम्पिक कमिटिमार्फत प्रारम्भिक नामावली (लङ लिस्ट) पठाउँदा परिषद्मा आधिकारिक रूपमा दर्ता रहेको ई-स्पोर्ट्स संघ, नेपालसँगको समन्वयमा खेलाडीहरूको नाम समावेश गरिएको थियो ।
सोही समयमा नेपाल ई-स्पोर्ट्स संघ नामक अर्को संस्था पनि सक्रिय रहेको थाहा पाएपछि परिषद्ले खेलाडीहरूको भविष्यलाई ध्यानमा राखी छलफल र समन्वयका लागि पत्राचार गरेको थियो। तर, उक्त समयमा उक्त संघ परिषद्को सम्पर्कमा नआएको विज्ञप्तिमा उल्लेख छ।
आयोजक राष्ट्रले तोकेको समयसीमा भित्र नेपाल ओलम्पिक कमिटिमार्फत अन्तिम नामावली (सर्ट लिस्ट) पठाउनु पर्ने थियो। सोही प्रक्रिया अनुसार आधिकारिक संघको सिफारिसमा १२ जना खेलाडीसहित १५ जनाको सहभागिताका लागि परिषद्बाट सिफारिस गरिएको थियो।
परिषद्का अनुसार आधिकारिक संघ इसानले पछि पत्राचार गर्दै आफूले सिफारिस गरेका खेलाडीहरू छनोट (क्वालिफाइ) हुन नसकेको जानकारी गराएको थियो। संघले नै खेलाडीहरू सहभागी हुन नसक्ने बेहोराको पत्र पठाएपछि परिषद्ले २०औँ एशियाली खेलकुदमा ई-स्पोर्ट्सको सहभागिता नहुने निर्णय गरेको हो।
यसैबीच नेपाल ई-स्पोर्ट्स संघले समय सकिएपछि आफ्ना खेलाडीहरू छनोट भएको भन्दै सहभागिताको माग गरेको थियो। तर, खेलकुदको नियम अनुसार प्रारम्भिक नामावली (लङ लिस्ट) मा समावेश नभएका खेलाडीलाई अन्तिम समयमा समावेश गर्न नसकिने प्राविधिक बाध्यताका कारण परिषद्ले उक्त दाबी कार्यान्वयन गर्न असमर्थ भएको जनाएको छ।
