साविक विजेता लुम्बिनी लायन्सका तीव्र गतिका बलर रुबेन ट्रम्पलम्यानले टोलीको सफलताको मुख्य आधार खेलाडीबीचको एकता, आपसी विश्वास र टिम कल्चर भएको बताएका छन्।
उनले ठूला नामका खेलाडी भित्र्याउनेभन्दा पहिलेदेखि सँगै खेलिरहेका खेलाडीको समूहलाई निरन्तरता दिनु बढी महत्वपूर्ण हुने धारणा राखेका छन्।
ट्रम्पलम्यानका अनुसार कुनै खेलाडीको नाम र अन्तर्राष्ट्रिय प्रतिष्ठाभन्दा टोलीको वातावरणमा घुलमिल हुन सक्ने क्षमता र मैदानमा उसको प्रदर्शन महत्वपूर्ण हुन्छ। ठूला नाम भएका खेलाडीले मात्रै टोलीलाई सफल बनाउँछन् भन्ने हुँदैन। खेलाडीबीच राम्रो सम्बन्ध र एकअर्कालाई बुझ्ने वातावरणले मैदानमा पनि सकारात्मक प्रभाव पार्ने उनको भनाइ छ।
लुम्बिनीले पछिल्ला सिजनमा आफ्नो मुख्य खेलाडीको समूहलाई निरन्तरता दिँदै आएको छ। एउटै समूहमा लामो समय सँगै खेल्दा खेलाडीबीच आपसी समझदारी र विश्वास बलियो बन्ने ट्रम्पलम्यानको विश्वास छ।
उनका अनुसार खेलाडीहरूले मैदानबाहिर पनि पर्याप्त समय सँगै बिताउनुपर्छ। एकअर्कालाई नजिकबाट चिन्ने, रमाइलो गर्ने र राम्रो सम्बन्ध बनाउने वातावरणले टोलीको संस्कृति बलियो बनाउँछ। यस्तो सम्बन्धले मैदानमा सञ्चार र समन्वयलाई सहज बनाउँछ।
ट्रम्पलम्यानले नयाँ खेलाडी अनुबन्ध गर्दा पनि टोलीलाई आवश्यक पर्ने स्थान पहिचान गरेर मात्रै खेलाडी भित्र्याउनुपर्ने धारणा राखेका छन्। अघिल्लो सिजनको प्रदर्शनका आधारमा टोलीमा रहेका कमजोरी सुधार्ने र आवश्यक स्थानमा मात्रै नयाँ खेलाडी थप्ने रणनीति उपयुक्त हुने उनको भनाइ छ।
उनका अनुसार उपाधि जित्ने र फाइनलसम्म पुग्ने क्षमता प्रमाणित गरिसकेका खेलाडीलाई विश्वास गर्नु नै टोलीको निरन्तरताको महत्वपूर्ण पक्ष हो। हरेक सिजन ठूलो संख्यामा खेलाडी परिवर्तन गरेर नयाँ टोली निर्माण गर्नुभन्दा स्थापित समूहलाई अझ बलियो बनाउनु प्रभावकारी हुन्छ।
लुम्बिनीले यही रणनीतिलाई आत्मसात् गर्दै एनपिएलमा आफ्नो प्रभाव कायम राखेको छ। टोलीले यस सिजन पनि पहिलो क्वालिफायरमा सुदूरपश्चिम रोयल्सलाई ६ विकेटले हराउँदै लगातार दोस्रो पटक फाइनलमा स्थान बनाएको छ।
ट्रम्पलम्यानका विचारमा बलियो टोली बन्न ठूला नाम, व्यक्तिगत प्रतिष्ठा र क्षमतामात्र पर्याप्त हुँदैनन्। खेलाडीबीचको सम्बन्ध, साझा लक्ष्य, निरन्तरता र एकअर्काप्रतिको विश्वास नै सफल टोलीको वास्तविक पहिचान हो।