युवा तथा खेलकुद मन्त्री बब्लु गुप्ताले आगामी माघ ३ गते अमेरिका भ्रमणमा जाने कार्यक्रम स्थगित गरेका छन्।
मन्त्री गुप्ताका स्वकीय सचिव विनोद रिमालका अनुसार समय अपुग भएकाले मन्त्री गुप्ता अहिलेका लागि अमेरिका नजाने भएका हुन्।
'भिसा लगायतका प्रक्रियाका लागि समय लाग्ने भयो। त्यसैले समय अपुग भएकाले उहाँ अहिलेका लागि अमेरिका जानु हुन्न,' उनले भने।
यसअघि मन्त्रिपरिषदले अमेरिकामा हुने 'रोल अफ युथ इन द डेभलपमेन्ट अफ नेपाल पोस्ट जेनजी रिभोलुसन' सम्बन्धी कार्यक्रममा सहभागी हुन मन्त्री गुप्तालाई स्वीकृति दिएपछि यो विषय चर्चामा आएको थियो।
कार्यक्रम विकास उप्रेती अध्यक्ष रहेको गैरआवासीय नेपाली संघ (एनआरएनए) ले आयोजना गर्न लागेको थियो। तर सतेन्द्र शाह अध्यक्ष रहेको अर्को एनआरएनए–अमेरिकाले मन्त्री गुप्तालाई बोलाएको छैन भनेर विज्ञप्ति निकालेको थियो। त्यसपछि मन्त्री अमेरिका जाने कार्यक्रम झनै विवादित बनेको थियो।
अमेरिकामा अहिले गैरआवासीय नेपालीहरूका तीन समूह छन्। त्यसमध्ये उप्रेतीको समूह एउटा हो। उप्रेतीले संघको युवा विभागले कार्यक्रम आयोजना गर्न लागेको थियो।
'यो कार्यक्रम हाम्रो युवा विभागले टेक्सासको डलासमा आयोजना गर्न लागेको हो,' उप्रेतीले सेतोपाटीसँग भनेका थिए, 'जेनजी आन्दोलनपछि युवाहरूको भूमिकाबारे युवा सम्मेलन गर्न लागिएको हो।'
मन्त्री गुप्तालाई बोलाउनेदेखि कार्यक्रमको योजना संघका युवा आशिस संग्रौलाले गरेका थिए।
मन्त्री गुप्ताले आफ्नो भ्रमण तालिका पक्का नगरेकाले कार्यक्रमको स्थान र मिति तय भने भएको थिएन।
माघ ६ मा प्रतिनिधिसभा निर्वाचनका लागि मनोनयन दर्ता गर्ने दिन भएकाले मन्त्री त्यसअघि नै नेपाल फर्कन चाहेका थिए। गैरदलीय सरकार भए पनि उनी राष्ट्रिय स्वतन्त्र पार्टी (रास्वपा) निकट छन्।
रास्वपा अध्यक्ष रवि लामिछाने, बालेन शाह र कुलमान घिसिङबीच एकता हुँदा मन्त्री गुप्ता सक्रिय देखिएका थिए। उनले सहमतिपछि तीन जनासँग फोटोसमेत खिचाएका थिए। गैरदलीय सरकारमा उनी कुनै एक पार्टीनिकट भएको भन्दै प्रधानमन्त्री सुशीला कार्कीले राजीनामा समेत मागेको सार्वजनिक भएको थियो।
मन्त्री गुप्ताका स्वकीय सचिव विनोद रिमालले अमेरिका भ्रमण जाने कार्यक्रम तीन साताअघि नै तय भएको बताए। बीचमा मन्त्रिपरिषद बैठक नबसेकाले केही दिनअघि मात्र भ्रमण स्वीकृत भएको रिमालको भनाइ छ।
'बीचमा एउटा मन्त्रिपरिषद बैठकको कार्यसूचीमा परेन, त्यसपछि १० दिन त बैठक नै बसेन। तीन दिनअघि अमेरिका जान मन्त्रिरिषदले स्वीकृति दिइसकेको थियो,' रिमालले भने, 'उहाँ सरकारी खर्चमा जान लाग्नुभएको थिएन। अमेरिकाकै आयोजकले उहाँको खर्च ब्यहोर्ने कुरा थियो।'
अमेरिकामा हुने कार्यक्रममा मन्त्रीले जेनजी आन्दोलनको विषयमा आफ्नो धारणा कार्यक्रम थियो।
'जेनजी आन्दोनल पछाडि गैरआवासीय नेपाली युवाको सहभागिता र उहाँहरूले कस्तो योगदान दिन सक्नहुन्छ भन्ने विषयमा मन्त्रीज्यूलाई प्रस्तुति दिन उहाँहरूले बोलाउनुभएको हो,' रिमालले भने।
अमेरिकामा मन्त्री गुप्ता मात्र जाने र साथमा अरू कोही लैजाने कार्यक्रम नभएको पनि रिमालको भनाइ थियो।
-1746009348.jpg)
