वडा ८ का विपुल महर्जन र वडा १७ की अर्सना महर्जन सातौं मेयर कप ललितपुर महानगरपालिका अन्तर वडा टेबलटेनिस प्रतियोगितामा शनिबार च्याम्पियन बनेका छन्।
स्थानिय राष्ट्रिय खेलाडी सहभागी हुन पाउने खुला सिंगल्सको पुरुषमा विपुल र महिलामा अर्सना पहिलो भएका हुन् ।
ललितपुर महानगरपालिकाको कनिबहालस्थित आयोजक वडा ६ को हातामा भएको प्रतियोगिताको पुरुष फाइनलमा विपुलले वडा ७ का डिकेन महर्जनलाई १४–१२, ११–६, २–११, ७–११ र १२–१० को सेटमा पराजित गरे । वडा १९ का कुशल न्याछो र वडा १२ का सुनिल महर्जत तेश्रो बने ।
महिलाको उपाधि भिडन्तमा अर्सनाले वडा २० की पमिला जोशीलाई ११–८, ११–७, ७–११ र ११–४ को सेटमा हराइन् । वडा ८ की सुरम्य शाक्य र वडा १६ की साइरा शाक्य तेश्रो भए ।
स्थानिय जनप्रतिनिधि पुरुष सिंगल्सको फाइनलमा वडा ११ का जुबन तण्डुकारले वडा २० का अमर डंगोललाई ९–११, ११–८, ११–८ र ११–७ ले पाखा लगाउदै स्वर्ण जिते । वडा ११ का कृष्ण महर्जन र वडा २० का सैलेन्द्र शाक्य तेश्रो भए । यो स्पर्धा पहिलोपटक थपिएको हो ।
प्रतियोगितामा वडा ६ का संस्काररत्न वज्राचार्य, वडा १९ का सइसिब डंगोल, वडा ११ का रेजिन शाक्य, वडा ९ का यारा महर्जन, वडा १९ का सचेत श्रेष्ठ, वडा ८ का योक्ती कर्माचार्य र वडा २० का रुजल महर्जन उदीयमान खेलाडी घोषित भए ।
विभिन्न १७ स्पर्धा समावेश रात्रीकालीन प्रतियोगितामा वडा १६ सर्वाधिक ५ स्वर्णसहित टिम च्याम्पियन बन्यो । प्रतियोगिताको अर्को संस्करण वडा २१ ले आयोजना गर्ने भएको छ । १७ वटै स्पर्धामा नगद पुरस्कार राखिएको प्रतियोगिताको कुल पुरस्कार राशी ४ लाख २५ हजार रुपैयाँ रहेको छ ।
विजेतालाई ललितपुर महानगरपालिकाकी उपमेयर मन्जली शाक्य वज्राचार्य, आयोजक वडा ६ का अध्यक्ष रुपेन्द्रराज शाक्यलगायतले एक कार्यक्रमबीच पुरस्कृत गरे । साताव्यापी प्रतियोगितामा ललितपुर महानगरपालिकाका २९ वडा मध्ये २१ वडाबाट ६ सय १६ खेलाडीले सहभागिता जनाएको प्राविधिक प्रमुख निकेश जोशीले जनाएका छन् ।
-1746009348.jpg)
