जगदीश भट्टले नेपाली राष्ट्रिय पुरुष भलिबल टोलीको प्रशिक्षकबाट अलग हुने निर्णय गरेका छन्।
पछिल्लो समय राष्ट्रिय भलिबल टोलीको खेलाडी छनोटको विषयमा कतिपयले प्रशिक्षक भट्टको आलोचना गरेका थिए।
उनले राष्ट्रिय टोलीमा खेलाडी प्राविधिक रुपमा छनोट गरेको बताए पनि समाजिक सञ्जालमार्फत् लगातार आलोचना भएको थियो।
भट्टले आफूमाथि आलोचना बढेकालेसामाजिक सञ्जालमार्फत् नै प्रशिक्षकको जिम्मेवारीबाट अलग हुने बताए।
‘भलिबल परिवारबाट पाएको असहयोग र पटकपटक खेप्नु परेको आलोचनाको पीडाले मेरो स्वास्थ्य अवस्था समेत बिग्रिएको छ। त्यसैले नकारात्मक, निराशावादी र स्वार्थी व्यक्तिहरूको झुन्डबाट अलग हुँदै अब बिश्राम लिने निर्णय लिएको छु,’ उनको भनाइ छ।
भट्टले राष्ट्रिय टोलीबाट अलग हुने निर्णय गरे पनि राष्ट्रिय खेलकुद परिषदको तालिम तथा प्रशिक्षण विभाग अन्तर्गतको आफ्नो जिम्मेवारीमा रहनेछन्।
कन्चनपुरका भट्ट विभागको उपनिर्देशक तथा भलिबलका मुख्य प्रशिक्षक समेत हुन्।
उनले महिला भलिबल टोलीलाई दुई पटक सेन्ट्रल जोन भलिबलको उपाधि जिताएका थिए भने साग गेम्समा रजत दिताउन महत्वपूर्ण भूमिका निभाएका थिए।
पछिल्लो समय उनी पुरुष टोलीको प्रशिक्षक थिए।
उनले समाजिक सञ्जालमा यस्तो लेखेका छन्-
बिगत तीन दशकको यात्रापछि—
मैले जे–जे गरेँ, त्यो पेशा र राष्ट्रको धर्म सम्झेर मात्र गरेँ। नेपाली भलिबललाई राष्ट्रिय खेलको रूपमा स्थापित गर्न र परिणाममुखी बनाउनका लागि आफ्ना व्यक्तिगत इच्छा–चाहनालाई त्यागेर यहा सम्म ल्याइपुर्याउन जे जे गरे सबै माझ छर्लङ्ग छ।
अझ राम्रो गर्न खोज्दा आइपर्ने हरेक समस्याको समाधान गर्दै आज यहाँसम्म आइपुगेको छु। यस यात्रामा साथ, सहयोग वा आलोचना गर्नु हुने सबैप्रति हार्दिक आभार प्रकट गर्दछु।
पेशा र राष्ट्रका खातिर पटक–पटक अवहेलना सहँदै ‘थोरै भए पनि केही गरौँ’ भन्ने सोचका साथ लागेको थिएँ। तर अब त्यो अवस्था रहेन। त्यसैले आगामी दिनमा राष्ट्रिय खेलकुद परिषद्को कार्यक्रमबाहेक—त्यो पनि जागिरमै रहेसम्म—मात्र संलग्न रहनेछु। अन्यथा, काम गर्न नसकिने अवस्थामा बसिरहनु भन्दा बाहिरबाटै भलिबल खेललाई सहयोग गर्ने बाटो रोज्नेछु। यसबाहेक अन्य कुनै गतिविधि (छनोट वा सहभागीता)मा संलग्न नहुने निर्णय लिएको छु भन्ने कुरा यहाँहरूलाई अवगत गराउन चाहन्छु।
पटक पटक कठिन परिस्थिति पार गर्दै यहाँसम्म आइपुग्दा हरेक समयमा नेपाली भलिबल खेललाइ परिणाममुखि बनाउनुका लागि खेपेको चुनौती कि म लाइ नजिक बाट सहयोग गर्ने वा कि मलाई मात्रै थाहा छ। अभाव र प्रभावका बीच निस्वार्थ भावले काम गर्दा आफ्नै भलिबल परिवारबाट पाएको असहयोग र पटक पटक खेप्नु परेको आलोचनाको पीडाले मेरो स्वास्थ्य अवस्था समेत बिग्रिएको छ। त्यसैले नकारात्मक, निराशावादी र स्वार्थी व्यक्तिहरूको झुन्डबाट अलग हुँदै अब बिश्राम लिने निर्णय लिएको छु।
असन्तुष्ट प्राणि हरुको इच्छा पुरा गर्ने कोशिस गर्नु होला मैले सकिन है ।
पारिवारिक दबाबले यो निर्णय लिएको हो।
तर भलिबल खेल मेरो आत्मा हो—यो सदैव मेरो जीवनसँग रहनेछ। जहाँ म खुशीसाथ आफ्ना अनुभव बाँड्न सक्छु, त्यहीँ म पुग्नेछु।
धन्यवाद।
-1746009348.jpg)
