शुक्रबारदेखि प्रदर्शनमा आएको फिल्म 'महाजात्रा' ले राम्रो व्यापार गरिरहेको छ। पहिलो दिनदेखि नै देशभरका हलमा दर्शकको उपस्थिति उत्साहजनक देखिएको छ।
कार्यकारी निर्माता रबिन्द्र सिंह बानियाँका अनुसार फिल्मले दुई दिनमा ३ करोड ६ लाख रुपैयाँ ग्रस कलेक्सन गरेको छ।
फिल्मले शुक्रबार १ करोड २३ लाख र शनिबार १ करोड ८३ लाख कलेक्सन गरेको बानियाँले बताए।
आइतबार होलीको दिन पनि यो फिल्म हेर्न हलमा दर्शकको चाप देखिएको छ।
होलीको दिन धेरै हलमा १२ बजेपछि मात्रै शोहरू राखिएका थिए।
‘काठमाडौंमा २ बजेपछिका अधिकांश शोहरू हाउसफुल भएको रिपोर्ट पाएका छौं। हामी हल भिजिटमा जाँदैछौं,’ कार्यकारी निर्माता बानियाँले भने।
काठमाडौं बाहिर पनि दर्शकको उपस्थिति राम्रो रहेको उनले बताए।
प्रदीप भट्टराईको लेखन तथा निर्देशन रहेको 'महाजात्रा' मा हरिवंश आचार्य, विपीन कार्की, रवीन्द्र सिंह बानियाँ, रबीन्द्र झा, वर्षा राउत लगायत कलाकारको अभिनय छ।
