केकी अधिकारीको निर्माण तथा अभिनय रहेको फिल्म 'बोक्सीको घर' को ट्रेलर सार्वजनिक भएको छ।
आइतबार ओएसआर डिजिटल युट्युब च्यानलमार्फत फिल्मको ट्रेलर सार्वजनिक गरिएको हो। सार्वजनिक ट्रेलरमा केकीलाई बोक्सीको रूपमा प्रस्तुत गरिएको छ।
सुलक्षण भारतीको लेखन तथा निर्देशन रहेको फिल्मलाई केकी अधिकारी फिल्मसले निर्माण गरेको हो। केकीका बाबु बद्री अधिकारी निर्माता रहेको फिल्मका कार्यकारी निर्माता राज घिमिरे हुन्।
फिल्ममा केकीसँगै सुपला सापकोटा, स्वेच्छा राउत, सुलक्षण भारती, रमा थपलिया, सुष्मा निरौला, सविन बास्तोलालगायत कलाकारको अभिनय छ। लोचन रिजालको ब्याकग्राउण्ड म्युजिक रहेको फिल्मलाई शिवराम श्रेष्ठले छायांकन, लोकेश बज्राचार्यले सम्पादन गरेका हुन्। टिफल्क फिल्म्सले फिल्मलाई वितरण गर्नेछ।
यो फिल्म वैशाख १४ गतेदेखि प्रदर्शन हुँदैछ।
