विल्सन विक्रम राई (तक्मे बुढा) को लेखन तथा निर्देशनमा बनेको फिल्म 'मैझारो' को फर्स्टलुक पोस्टर सार्वजनिक गरिएको छ।
निर्माणपक्षले शुक्रबार दुइटा पोस्टर ल्याउँदै प्रदर्शन मिति समेत घोषणा गरेको छ। फिल्म तिहारको अवसर पारेर कात्तिक ७ गतेबाट प्रदर्शनमा आउने छ।
एक पोस्टरमा मुख्य कलाकार धिरज मगर, मिरूना मगर र दिया पुन देखिएका छन्। धिरज र मिरूनाले राई समुदायको पहिरनमा ढोलसहितको दृश्य दिएका छन् भने दिया पुन लिम्बू समुदायको ढाका साडीमा प्रस्तुत भएकी छन्। यसले नेपाली ग्रामीण जीवनशैली, संस्कृति र परम्परालाई फिल्मले चित्रण गरेको संकेत गर्छ।
पोस्टरमा एक पुरूषको साथमा दुई महिलाहरू देखिनुले फिल्ममा त्रिकोणात्मक प्रेम कथा वा यी तीन पात्रहरूको बीचमा कुनै विशेष सम्बन्धको वरिपरि कथा घुमेको हुन सक्ने अनुमान लगाउन सकिन्छ।
अर्को पोस्टरमा धिरज र मिरूना प्रेमिल मुद्रामा बसेका छन्। धिरजले बन्चरो समातेका छन् भने मिरूना कुर्ता–सुरुवालमा उनीतर्फ नजर लगाइरहेकी छन्, जसबाट उनीहरूबीचको प्रेम सम्बन्ध रहेको हुनसक्ने संकेत दिन्छ।
निर्माणपक्षका अनुसार 'मैझारो' मा पूर्वी पहाडको प्राकृतिक सौन्दर्य, संस्कृति र मानव सम्बन्धलाई उजागर गर्ने प्रयास गरिएको छ।
फिल्ममा धिरज, मिरूना र दियासँगै बुद्धि तामाङ, सुनिल थापा, पुस्कर गुरूङ, अभयराज बराल, माओत्से गुरूङ, कविता आले, रजनी गुरूङ, प्रेम सुब्बा, उदय सुब्बा, अनिल सुब्बा, भूपेन्द्र लिङदेन र विशाल लिम्बुको अभिनय छ।
'तक्मे प्रोडक्सन' को ब्यानरमा निर्माण भइरहेको फिल्ममा अनमोल गुरूङ र तोरेम्पाहाङ राईको संगीत छ। सौरभ लामाको छायांकन रहेको फिल्म मित्र डि. गुरूङले सम्पादन गर्नेछन्।
-1746009348.jpg)
