शुक्रबारबाट प्रदर्शनमा आउन लागेको फिल्म 'हर्ष' को बुधबार ललितपुरस्थित लविम मलमा प्रिमियर शो गरिएको छ।
प्रिमियरमा स्वर्गीय निर्देशक शिव रेग्मीकी श्रीमती ज्ञानु रेग्मीसहित फिल्मका निर्माता, निर्देशक, लेखक, कलाकार र सञ्चारकर्मीको बाक्लो उपस्थिति रह्यो।
भारतको मुम्बईमा बस्दै आएकी अभिनेत्री निरूता सिंह लामो समयपछि नेपाली फिल्मको प्रिमियरमा सहभागी भइन्। उनले एकता पौडेलको डेब्यु निर्देशकीय 'हर्ष' एकदमै राम्रो बनेको बताइन्।
फिल्मको सुरूवातमै आफूले स्वर्गीय निर्देशक शिव रेग्मीको तस्बिर देखेपछि भावुक बनेको अभिनेत्री सिंहले बताइन्।
उनले भनिन्, '‘हर्ष’ एकदमै सन्देशमूलक फिल्म हो। यस्ता घटनाहरू हाम्रो घर-परिवार र समाजमा घटेको मैले देखेकी छु। त्यसैले एकपटक यो फिल्म सबैले हेर्नुहोला।'
यस्तै, स्वर्गीय निर्देशक शिव रेग्मीकी पत्नी ज्ञानु रेग्मीले पनि 'हर्ष' राम्रो बनेको भन्दै भान्जी एकतालाई सफलताको शुभकामना दिइन्। '१२ वर्षपछि खोला पनि फर्किन्छ भन्छन्, हाम्रो परिवारमा पनि आज त्यस्तै भएको छ। १२ वर्षपछि भान्जी एकता पौडेलले फिल्म निर्माण तथा निर्देशन गर्ने आँट गरेकी छन्। मलाई एकदमै खुसी लागेको छ,' उनले भनिन्।
ज्ञानुले भावुक हुँदै थपिन्, 'निर्देशक शिव रेग्मी वा मेरो श्रीमान्ले भन्नुहुन्थ्यो- नेपाली फिल्ममा काम गर्ने मान्छे आउँदा कहिल्यै नरिसाउनु। नेपाली फिल्म उद्योग मेरो घर हो। त्यहाँ काम गर्ने कलाकारहरू मेरा सन्तान हुन्। त्यसैले उनीहरूलाई सधैं माया गर्नु भनेको अझै सम्झना छ।'
प्रिमियरमा सहभागी अभिनेता तथा व्यवसायी संजोग कोइरालाले पनि 'हर्ष' एउटा फरक अनुभव दिने पारिवारिक फिल्म बनेको बताए।
अभिनेत्री वर्षा राउतले पनि प्रिमियर शोमा फिल्म राम्रो बनेको प्रतिक्रिया पाउँदा आफू हर्षित भएको बताइन्।
यस्तै, फिल्मका मुख्य अभिनेता खगेन्द्र लामिछाने पनि प्रिमियरमा मिलेको प्रतिक्रियाले खुसी देखिए। आफूले पहिलो पटक-फरक खालको फिल्म गरेकाले कस्तो होला भन्ने लागेको भए पनि सबैले मन पराइदिएकोमा उनले खुसी व्यक्त गरे। अब दर्शकले पनि फिल्म मन पराउनेमा उनी विश्वस्त देखिए।
डेब्यु निर्देशक एकता पौडेलले आफूले बच्चादेखि फिल्म निर्माण तथा निर्देशन गर्ने देखेको सपना साकार हुँदा निकै खुसी लागेको बताइन्। 'आज प्रिमियर शोमा फिल्म हेर्नुभएका पाहुनाहरूले मामाको झल्को दिन सफल भएको बताउनुभएको छ। यसले आगामी दिनमा अझै राम्रा फिल्म निर्माण गर्नुपर्ने चुनौती समेत थपिएको छ। फिल्मकर्मी तथा पत्रकारहरूले जस्तै दर्शकले पनि हर्ष मन पराउनुहुन्छ भन्ने अपेक्षामा छु, हेरौं के हुन्छ,' निर्देशक पौडेलले भनिन्।
अष्टलक्ष्मी प्रोडक्सन्स् र ई–प्राईम मुभिजको ब्यानरमा निर्माण भएको फिल्मको कथा स्वयं निर्देशक पौडेलको हो। फिल्ममा खगेन्द्र र वर्षासहित नीर शाह, सन्तोष पन्त, साइमन बादी, शर्मिला मल्ल, माओत्से गुरूङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन, सिर्जना नापितलगायतको अभिनय छ।
आलोक शुक्लाको छायांकन रहेको फिल्ममा लोकेश बज्राचार्यको सम्पादन छ। प्रशन्न पौडेल र विकास पौडेल निर्माता रहेको फिल्ममा हिक्मत चोखाल कार्यकारी निर्माता छन्।
-1756446574.jpg)
-1746009348.jpg)
