फिल्म 'आ बाट आमा' को टिजर युट्युबमा सार्वजनिक भएको छ।
सोमबार ओएसआर डिजिटलको युट्युब च्यानलबाट सार्वजनिक टिजरमा विदेशिन लागेको छोराप्रति आमाबुवाको स्नेहलाई देखाइएको छ।
यो फिल्ममा चर्चित भारतीय कलाकार प्रदीप रावतले पनि शीर्ष भूमिकामा अभिनय गरेका छन्। 'गजनी' भिलेनका रूपमा परिचित प्रदीप अभिनेता पल शाहको बुवाको भूमिकामा छन्। आमाको भूमिकामा अभिनेत्री विपना थापाले अभिनय गरेकी छन्।
सार्वजनिक १ मिनेट ५० सेकेण्डको टिजर मर्मस्पर्शी लाग्छ। छोराको बिदाई गर्नुअघिको रात आमाबुवालाई निन्द्रा नलागेको टिजरमा देखिन्छ।
आर्या इन्टरटेन्मेन्ट प्रा.लिको प्रस्तुतिमा निर्माण भएको फिल्म 'आ बाट आमा' चन्द्र पन्तले निर्देशन गरेका हुन्। फिल्ममा प्रदीप, विपना र पलका साथमा सिम्रन पन्त, साइग्रेस पोखरेल, उषा उप्रेती, रविन्द्र झा, गजित बिष्ट, अंशु महर्जन, बेगम नेपाली लगायतले अभिनय गरेका छन्। साथै बालकलाकारमा समाइरा थापा र शान अधिकारी रहेका छन्।
निर्देशक पन्तकै कथा, पटकथा रहेको फिल्ममा लेखन अभिमन्यू निरवीको हो। फिल्मको संवादमा अमर न्यौपाने, अभिमन्यू निरवी र चन्द्र पन्तले सहकार्य गरेका छन्।
फिल्मको निर्माता कृष्ण प्रसाद सुवेदी, ओमकार पन्त, प्रकाश जंग कुँवर, ध्रुव प्रसाद न्यौपाने र क्षितिज ढुंगाना हुन्। कार्यकारी निर्माता करण सिंह रसाइली रहेका छन्। नवराज उप्रेतीको छायांकन, गम्भीर बिष्ट र दिलिप ओखडाको कोरियोग्राफी रहेको यस फिल्मका गीतमा कोशिस क्षेत्री, थानेश्वर गौतम, बाबुल गिरी, अभी सुनारको संगीत सुन्न सकिनेछ। फिल्मको सम्पादन साहिल खान र मिलन श्रेष्ठले गरेका हुन्।
नेपालमा फिल्मको वितरण आर आर फिल्मस्का लागि रोहित कट्टेल र रत्न श्रेष्ठले गर्दैछन्।
'आ बाट आमा' माघ १६ गतेदेखि प्रदर्शनमा आउनेछ।
-1746009348.jpg)
