फिल्म 'मिरमिरे' आगामी माघ १ गतेदेखि प्रदर्शनमा आउने तयारीमा छ। चार दिनअघि सार्वजनिक गरिएको फिल्मको टिजरले यतिबेला दर्शकबाट सकारात्मक प्रतिक्रिया पाइरहेको छ।
टिजरअनुसार फिल्मले बुवा र छोरीबीचको भावनात्मक सम्बन्धको कथा पेश गर्छ। पछिल्लो समय सन्तानप्रति अभिभावकले गर्ने अथाह स्नेह र त्यागमा आधारित फिल्महरूले बक्स अफिसमा राम्रो व्यापार गरिरहेको सन्दर्भमा ‘मिरमिरे’ ले पनि दर्शकको मन जित्ने अपेक्षा गरिएको छ।
फिल्मको कथावस्तुअनुसार आमाले घर छोडेपछि सानी छोरी र बुवा मात्र घरमा हुन्छन्। आफैं केही गर्न नसक्ने छोरीको स्याहार, घरको काम र आफ्नो जागिरको सन्तुलन मिलाउन बुवाले गर्ने संघर्ष नै फिल्मको मुख्य सार हो। बुवाले एक्लै कसरी यी सबै जिम्मेवारी पूरा गर्छन् र छोरीप्रति कस्तो कर्तव्य निर्वाह गर्छन् भन्ने विषयलाई फिल्मले केन्द्रमा राखेको अनुमान गर्न सकिन्छ। फिल्ममा अभिनेता दयाहाङ राईले बुवाको भूमिका निर्वाह गरेका छन्।
बुवा-छोरीको प्रेम र त्यागको कथा भएकाले दर्शकले फिल्म मन पराउनेमा निर्माण पक्ष विश्वस्त देखिन्छ। निर्देशक यम शेर्पा भन्छन्, 'हरेक बुवाआमासँग आफ्ना सन्तानप्रति अथाह माया हुन्छ, फरक यति हो कि त्यो कति देखाइन्छ। यो हरेक घरको कथा भएकाले दर्शकले ‘मिरमिरे’ लाई मन पराउने र धेरैले यसलाई आफ्नै कथा महसुस गर्ने हाम्रो विश्वास छ।'
यार्सा फिल्म्सको प्रस्तुति रहेको यस फिल्ममा दयाहाङसहित प्रकाश सपूत, सिर्जना निङलेखु, माओत्से गुरूङ, छुल्ठिम गुरूङ, भोलाराज सापकोटा, शाइसा गौचन, दिविशा पन्त, चिराग श्रेष्ठ र नमनराज गजुरेलको अभिनय छ।
फिल्ममा निमु शेर्पा, छोङ्बा लामा शेर्पा र आङ्छिरिङ शेर्पा निर्माता तथा गोविन्द बोहरा र सुदीप कुँवर सह–निर्माता रहेका छन्। त्यस्तै, आरआर फिल्म्सका सञ्चालक एवं फिल्म वितरक रोहित कट्टेल फिल्मका कार्यकारी निर्माता हुन्।
-1746009348.jpg)
