गायिका बेनुका राईले फिल्म 'मिरमिरे' का लागि गीत गाएकी छन्। उनले फिल्मको कथासँग सुहाउँदो र भावनात्मक गीतमा स्वर दिएकी हुन्।
बेनुकाले स्वर दिएको छोरी शीर्षकको गीतमा हर्क साउदको शब्द र मनोज थापा मगरको संगीत छ।
यम शेर्पाको लेखन तथा निर्देशन रहेको 'मिरमिरे' को मुख्य भूमिकामा दयाहाङ छन्। यो फिल्मको टिजर सार्वजनिक भइसकेको छ।
बुवा र छोरीको भावनात्मक सम्बन्ध रहेको फिल्मको टिजर दर्शकहरूले मन पराइरहेका छन्।
बेनुकाले स्वर दिएको गीत टिमले केही दिन पछाडि सार्वजनिक गर्ने तयारी गरेको छ।
दयाहाङ राईकी श्रीमती बेनुका कुशल गायिका हुन्। तर, उनी पारिवारिक व्यस्तताका कारण पछिल्ला वर्ष गायनमा त्यति धेरै सक्रिय छैनिन्। दयाहाङको फिल्ममा आफ्नै जीवनसाथीको स्वर समावेश हुनु संयोग मात्र नभइ विशेष मानिएको छ।
यार्सा फिल्म्सको प्रस्तुति रहेको 'मिरमिरे' मा दयाहाङसहित प्रकाश सपुत, सिर्जना निङलेखु, माओत्से गुरूङ, छुल्ठिम गुरूङ, भोलाराज सापकोटा, शाइसा गौचन, दिविशा पन्त, चिराग श्रेष्ठ र नमनराज गजुरेल लगायतको अभिनय छ।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको 'मिरमिरे' का सह-निर्मातामा गोविन्द बोहरा, सुदिप कुँवर छन्। कार्यकारी निर्मातामा आरआर फिल्मसका सञ्चालक समेत रहेका फिल्म वितरक रोहित कट्टेल रहेका छन्। 'मिरमिरे' माघ १ गतेदेखि प्रदर्शनमा आउने तालिका छ।
*शीर्षक सच्याइएको छ।
-1746009348.jpg)
