माघे संक्रान्तिको अवसरमा तीन नेपाली फिल्म प्रदर्शनमा आएका छन्।
बिहीबारदेखि 'मिरमिरे', 'गोबर गणेश' र 'भाइरल गोर्खे' रिलिज भएका हुन्।
यम शेर्पाको निर्देशनमा बनेको फिल्म 'मिरमिरे' मा दयाहाङ राई, प्रकाश सपुत र सिर्जना निङलेखु मुख्य भूमिकामा छन्। फिल्मले बाबु-छोरीको भावनात्मक सम्बन्धको कथालाई केन्द्रमा राखेको छ। यसमा माओत्से गुरूङ, भोलाराज सापकोटा, छुल्ठिम गुरूङ, शाइसा गौचनलगायत कलाकारहरूको पनि अभिनय छ।
त्यस्तै, 'गोबर गणेश' हास्य कलाकार मरिचमान श्रेष्ठ (बल्छी धुर्वे) को निर्देशनमा बनेको हो। फिल्मको मुख्य भूमिकामा बल्छी धुर्वे स्वयं छन् भने साथमा वर्षा शिवाकोटी, विनोद न्यौपाने, पदम तामाङ, पुजन घिमिरे, बुद्धि तामाङ, निर्मल शर्मा, लक्ष्मीनाथ तिमलसेना, सन्तोष बानिया, माओत्से गुरूङ, सीतादेवी तिमल्सिनालगायत कलाकारहरूको अभिनय छ। यो फिल्ममा एउटा उपेक्षित युवाको संघर्षबाट सपनातर्फको कथा देखाइएको छ।
अर्को फिल्म 'भाइरल गोर्खे' मा सौगात मल्ल र सृष्टि श्रेष्ठ मुख्य भूमिकामा छन्। निगम श्रेष्ठको निर्देशनमा बनेको कमेडी-ड्रामा जनराको फिल्मले सामाजिक सञ्जालमा भाइरल बन्ने प्रवृत्तिलाई प्रश्न गर्छ।
यो फिल्ममा सौगात र सृष्टिसहित बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल, मिस पवीलगायत कलाकारहरूको पनि अभिनय छ।
-1746009348.jpg)
