माघ २३ गतेबाट प्रदर्शनमा आउन लागेको फिल्म 'कुमारी' ले आफ्नो प्रवद्र्धनका लागि देशका विभिन्न सहरमा म्युजिकल कन्सर्ट गरिरहेको छ।
नेपालगन्जबाट सुरू भएको देशव्यापी सांगीतिक यात्राको दोस्रो कार्यक्रम शनिबार साँझ पोखरामा सम्पन्न भयो। पोखराको हल्लनचोकमा आयोजित 'कुमारी लाइभ म्युजिकल कन्सर्ट विथ केहर एन्ड द लुङा' मा ७ हजार दर्शकको उपस्थिति रहेको फिल्मको टिमले जनाएको छ।
कन्सर्टमा फिल्मका प्रमुख कलाकारहरू अविशेक खड्का र आकृति राजभण्डारी स्टेजमा देखा पर्दा दर्शकको तर्फबाट हुटिङको भएको थियो। उनीहरूले अहिलेको चर्चित गीत 'डोको बुन्ने निगालो चोयाले' मा प्रत्यक्ष नृत्य प्रस्तुत गर्दा माहोल संगीतमय बनेको थियो। कलाकारद्वयले पोखरेली दर्शकबाट पाएको मायाप्रति आभार प्रकट गर्दै फिल्म 'कुमारी' हेर्न आग्रह समेत गरे।
सांगीतिक माहोललाई तताउन पाश्र्व गायक केहर सिं लिम्बु र उनको ब्यान्ड ‘केहर एन्ड द लुङा’ का सदस्यहरूले फिल्मका गीतहरू 'डोको बुन्ने...', 'कता छौ मेरो फूल' र 'तिमी बिना' सँगै आफ्ना चर्चित सिर्जनाहरू 'सरर' र 'बैगुनी' प्रस्तुत गरेका थिए।
फिल्मका सबै गीतमा स्वर दिएका केहर र उनको ब्यान्डको प्रस्तुतिमा पोखरेली दर्शकहरू मज्जाले झुमेका देखिन्थे। बिग मार्टको प्रस्तुती र पावर्ड बाईमा आयोजित यो कन्सर्टको स्थानीय व्यवस्थापन प्रचारले गरेको थियो।
पोखरामा फिल्म र कलाकारहरूप्रति देखिएको यो क्रेजले आफू निकै पुलकित भएको निर्देशक दिनेश राउतले बताए। स्टेजबाटै दर्शकलाई धन्यवाद दिँदै उनले दर्शकको यो साथले फिल्मप्रति थप उत्साह जगाएको बताए।
विनिश इन्टरटेन्मेन्टको ब्यानरमा महेन्द्र अधिकारीद्वारा निर्मित 'कुमारी' टोली अब माघ ६ गते चितवन, १० गते काठमाडौं र १७ गते झापाको दमकमा प्रस्तुत हुनेछ।
आगामी माघ १० गते काठमाडौँको भृकुटीमण्डपमा आयोजना हुने विशेष कन्सर्टमा फिल्मको आधिकारिक ट्रेलर समेत सार्वजनिक गर्ने तयारी छ।
-1746009348.jpg)
