विपिन कार्की र मिरूना मगर अभिनीत सुपरहिट नेपाली फिल्म 'ऊनको स्वीटर' अब युट्युबमा सार्वजनिक हुने भएको छ।
आर्टमाण्डुको प्रस्तुति र नवीन चौहानको लेखन तथा निर्देशनमा बनेको फिल्म यसै साता युट्युबमार्फत दर्शकमाझ आउने भएको हो। यही बिहीबार (माघ ८ गते) आर्टमाण्डुको आधिकारिक युट्युबमार्फत फिल्म रिलिज गर्ने निर्णय गरिएको निर्देशक चौहानले बताए।
गत बैशाख २६ गते नेपालसहित विभिन्न देशमा प्रदर्शनमा आएको फिल्मले दर्शकहरूको राम्रो प्रतिक्रिया पाएको थियो। नेपालमा १२ करोड रूपैयाँभन्दा बढी कमाउँदै फिल्म ५१ दिनभन्दा लामो समय प्रदर्शन भएको थियो। हालै भारतमा समेत गौरवमय ५१ दिन मनाएको फिल्म अब डिजिटल प्लेटफर्ममार्फत विश्वभर रहेका नेपाली दर्शकहरूसमक्ष पुग्ने भएको हो।
आर्टमाण्डुले आफ्नो अफिसियल फेसबुक पेजमा समेत एक भिडिओ सार्वजनिक गर्दै यसबारे जानकारी दिएको छ। 'हलमा अपार माया पाएको र देश–विदेशका दर्शकहरूको मन जित्न सफल फिल्म ‘ऊनको स्वीटर’ अब युट्युबमार्फत सबैको पहुँचमा आउँदैछ। सादगी, आत्मीयता र इमान्दारिताले बनेको यो फिल्म अब सम्पूर्ण दर्शकहरूको साझा कथा बन्नेछ', आर्टमाण्डुले भनेको छ।
'ऊनको स्वीटर' मा विपिन र मिरूनासहित सुनील पोखरेल, माओत्से गुरूङ, विल्सन विक्रम राई, प्रेम सुब्बा, एलेक्स पारस, परिक्षा लिम्बु, सुरज तमु, शारदा देवी सिलवाल, मेनुका प्रधानलगायत कलाकारहरूको अभिनय छ।
-1746009348.jpg)
