मरिचमान श्रेष्ठ (बल्छी धुर्बे) निर्देशित फिल्म 'गोबर गणेश' को कमाइ करोड नाघेको छ।
माघ १ गतेदेखि प्रदर्शनमा आएको फिल्मले १० दिनसम्ममा १ करोड १४ लाख ३५ हजार २०६ रूपैयाँ ग्रस कमाइ गरेको हो।
माघ १० गते (शनिबार)सम्म सिनेपाः बक्सअफिसमा उक्त कमाइ हुँदा फिल्मको ४० हजार २३४ वटा टिकट बिक्री भएको छ।
एकैदिन रिलिज 'भाइरल गोर्खे' ले सोही अवधिमा ३४ लाख ५३ हजार ७६० रूपैयाँ ग्रस कमाएको छ। निगम श्रेष्ठ निर्देशित फिल्मको १० हजार ६०५ वटा टिकट बिक्री भएका छन्।
त्यस्तै, माघ १ मै रिलिज फिल्म 'मिरमिरे' ले १० दिनमा ३३ लाख ७२ हजार ७१५ रूपैयाँ ग्रस कमाएको छ। यम शेर्पा निर्देशित फिल्मले उक्त कमाइ गर्दा १० हजार ८१३ वटा टिकट बिक्री भएको चलचित्र विकास बोर्डको विवरणमा उल्लेख छ।
‘गोबर गणेश’ को मुख्य भूमिकामा बल्छी धुर्वे स्वयं छन् भने साथमा वर्षा शिवाकोटी, विनोद न्यौपाने, पदम तामाङ, पुजन घिमिरे, बुद्धि तामाङ, निर्मल शर्मा, लक्ष्मीनाथ तिमलसेना, सन्तोष बानिया, माओत्से गुरूङ, सीतादेवी तिमल्सिनालगायत कलाकारहरूको अभिनय छ। यो फिल्ममा एउटा उपेक्षित युवाको संघर्षबाट सपनातर्फको कथा देखाइएको छ।
त्यस्तै, 'भाइरल गोर्खे' मा सौगात मल्ल र सृष्टि श्रेष्ठ मुख्य भूमिकामा छन्। यो कमेडी-ड्रामा जनराको फिल्मले सामाजिक सञ्जालमा भाइरल बन्ने प्रवृत्तिलाई प्रश्न गर्छ। यो फिल्ममा सौगात र सृष्टिसहित बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल, मिस पवीलगायत कलाकारहरूको पनि अभिनय छ।
त्यस्तै, 'मिरमिरे' मा दयाहाङ राई, प्रकाश सपुत र सिर्जना निङलेखु मुख्य भूमिकामा छन्। फिल्मले बाबु–छोरीको भावनात्मक सम्बन्धको कथालाई केन्द्रमा राखेको छ। यसमा माओत्से गुरूङ, भोलाराज सापकोटा, छुल्ठिम गुरूङ, शाइसा गौचनलगायत कलाकारहरूको पनि अभिनय छ।
-1746009348.jpg)
